बीबीसी । हरेक साल नयाँ वर्ष सुरु हुने समयमा जापानीहरु ‘फुकुबुकुरो’ नामक रहस्यमय लक्की ब्यागका लागि घण्टौँ लाइन बस्ने गरेका छन् । यसरी ती रहस्यमय झोलाहरुमा पसल अनुसार लुगादेखि खानेकुरासम्मका सबै उपभोग्य वस्तुहरु राखि एकदमै सस्तो मूल्यमा बेच्ने गरिएको छ । 

सबैको लक्की ब्यागमा भिन्दाभिन्दै सामान हुने हुनाले कसलाई के पर्यो भन्नेबारे सबैभन्दा बढी उत्साह रहने गरेको छ । जनवरी १ का दिन खुल्ने फुकुबुकुरोको सेल हप्ताभर जारी रहन्छ । धेरै जापानीहरुका लागि नयाँ वर्ष फुकुबुकुरोकै कारण उत्साहजनक बन्ने गरेको छ । यसबिना उनीहरुले नयाँ साल खल्लो मान्ने गर्छन् । 

वास्तवमा फुकुबुकुरोको यो चलन १९०० को दशकमा पसलेहरुले पुराना स्टकबाट छुटकारा पाउने उद्देश्यले सुरु गरेको बताइन्छ । त्यसबेला उनीहरुले नयाँ वर्षमा पुराना सामान हटाउन बाँकी रहेका वस्तुहरु रहस्यमय तरिकाले झोलामा प्याक गरेर कम मूल्यमा विक्री गर्ने गरेका थिए । तर अहिले भने नयाँ वर्षको सुरुवातसँगै हरेक साल यसले देशभर हङ्गामा मच्चाउने गरेको छ । जापानमा मात्र नभएर स्टारबक्स र अर्मानी जस्ता अन्तर्राष्ट्रिय ब्रान्डले समेत अहिले यो ट्रेन्ड अपनाइरहेको पाइएको छ ।

यसका साथै अहिलेको लक्की ब्यागमा बाँकी रहेका पुराना सामान नभएर उच्च गुणस्तरका वस्तुहरु राखिने गरिएकाले पनि यसप्रतिको मोह झन् बढ्दै गएको बताइन्छ । यसरी लक्की ब्याग भित्रका वस्तुहरु बजारमा छुट्टै किन्नु परेमा धेरै महङ्गो पर्ने हुनाले पनि मानिसहरु आफूलाई मन पर्ने स्टोरमा घण्टौँ लाइन बसेर भएपनि फुकुबुकुरो खरिद गर्न जान्छन् । ‘फुकुबुकुरो किन्न जानु जुवा खेले जस्तै हुन्छ’, जापानकी क्लार्क लटनले बीबीसीसँगको कुराकानीमा बताइन् । उनी भन्छिन्, ‘त्यो झोला भित्र के छ भन्ने थाहा नहुनुले यो प्रक्रियालाई वास्तवमै ज्यादै उत्साहजनक बनाइदिने गर्दछ । साथै यसले सबैलाई महङ्गा सामानहरु सस्तोमा खरिद गर्ने मौका पनि दिलाएको छ ।’ 

यसरी फुकुबुकुरो खरिद गरेपछि मानिसहरुले त्यस भित्रका सामानको तस्बिर लिइ सामाजिक संजालमा पोस्ट गरि खुसी व्यक्त गर्ने गरेका छन् । त्यस्तै यससँग असन्तुष्ट ग्राहकहरुले भने अनलाइन मार्फत अरुसँग आफ्नो लक्की ब्याग साट्ने वा बेच्ने गरेको पनि पाइन्छ भने कोही चाहिँ फेरि अर्कोवर्षको प्रतिक्षा गरिरहेको बताउँछन् । यस्तोमा अहिले रेस्टुरेन्ट र क्याफेहरुले समेत फुकुबुकुरो बेचिरहेका छन् ।