काठमाडौं । प्रिमियर स्टिलले उत्पादनको बिक्री सुरु गरेको छ । नेपाल गुणस्तर चिन्हप्राप्त प्रिमियरले उत्पादन गरेको एफई ५०० छड विक्री सुरु गरेको हो ।

कम्पनीका छड विभिन्न साइजमा उपलब्ध छन् । ८ एमएम देखि ३२ एमएम सम्ममा उपलब्ध हुने प्रिमियर स्टिल उच्च गुणस्तरको रहेको कम्पनीको दाबी छ । प्राइम बिलेटको मात्र प्रयोग गरी उत्पादन हुने हुँदा यो आफैंमा गुणस्तरीय छड बन्न पुगेको कम्पनीले जारी गरेको प्रेस विज्ञप्तिमा उल्लेख छ ।

कम्पनीको उद्योगमा प्रति घण्टा ४० टनका दरले छड उत्पादन हुन्छ । कम्पनीले २० घण्टा उद्योग सञ्चालन गरेर ४ घण्टा मेन्टेनेन्स गर्ने गरेको जनाएको छ । 

अहिलेसम्मकै सबैभन्दा आधुनिक र उन्नत प्रकारको जापानी प्रविधिको फलामे डन्डीको उत्पादन गरिने कम्पनीको दाबी छ ।

उद्योगमा पूर्ण स्वचालित रोलिङ प्रणाली भएकाले मानवजन्य गल्तीका कारण उत्पादन कमजोर नहुने र कम्प्युटर न्युमेरिकल कन्ट्रोल्ड मेसिनबाट यसको रिब डिजाइन र नोचिङ गरिने हुँदा सिमेन्टको मिश्रणसँग बलियो बन्धन समेत हुने कम्पनीको दाबी छ ।

प्रिमियर स्टिलमा भारतको आन्ध्र प्रदेशस्थित विशाखापट्टनम, उडिसाको रायगढ, झारखण्डस्थित जमसेदपुर र पश्चिम बंगालस्थित दुर्गापुरबाट कच्चा पदार्थ प्राइम बिलेट ल्याएर उत्पादन गर्ने गरिएको छ ।

छडको मुख्य बजार हाल प्रदेश नं. १ रहेको छ भने आगामी दिनहरुमा उत्पादनलाई मुलुकभरि पुर्याउने लक्ष्य कम्पनीले लिएको छ ।