एप्पल मात्र होइन सामसुङ पनि घाटामा

एप्पल मात्र होइन सामसुङ पनि घाटामा

एजेन्सी । व्यापारिक घाटाको सामना गर्ने कम्पनीमा अहिले सामसुङको नाम पनि परेको छ । दक्षिण कोरियाली कम्पनी सामसुङले दिएको जानकारी अनुसार पछिल्लो तीन महिनामा कम्पनीको नाफा दर विश्लेषकहरुको अनुमान विपरित गत वर्षको भन्दा ३० प्रतिशत कम भएको छ । स्मार्टफोन उद्योगमा बढ्दो प्रतिस्पर्धा र सामसुङको मेमोरी चिपको घट्दो मागका कारण कम्पनीको व्यापारमा यस्तो गिरावट आएको बताइएको छ । 

गत हप्ता मात्र आइफोन निर्माण कम्पनी एप्पलले पनि विगतका वर्षहरु भन्दा कम फोन विक्री गर्ने घोषणा गरेको थियो । केही समय यता देखि अमेरिका र चीनबीच जारी व्यापार युद्धका कारण चीनमा आइफोनको माग निराशाजनक देखिएपछि कम्पनीले यस्तो निर्णय सुनाएको हो । विश्वको सर्वाधिक ठूलो स्मार्टफोन निर्माण कम्पनी सामसुङले भने मंगलबार आफ्नो व्यापार घाटामा चीनको प्रभावबारे कुनै उल्लेख गरेको छैन । तरपनि सामसुङको शेयरमा हाल राजधानी सिओलमै १.७ प्रतिशतले गिरावट आएको छ । 

कम्पनीले पछिल्लो वर्षको तुलनामा आफ्नो एक चौथाइ बजार भाउ गुमाइसकेको छ । वास्तवमा विश्वको सबैभन्दा ठूलो स्मार्टफोन बजार मानिएको चीनको अर्थतन्त्रमा पछिल्लो समय लगातार समस्या आइरहेपछि यसले विश्वभरका विभिन्न व्यवसायहरुमा नकारात्मक प्रभाव पारिरहेको छ । 

सामसुङले स्मार्टफोनका साथै त्यसका महत्वपूर्ण पूर्जाहरु पनि आफैँ निर्माण गरि विक्री गर्ने गरेको छ । मेमोरी चिप देखि डिस्प्ले स्क्रिन सम्मका प्रमुख उपकरणहरु सामसुङले अन्य ठूला प्राविधिक कम्पनीहरुलाई बेच्दै आएको छ । एप्पलले हालै सार्वजानिक गरेको आइफोनमा प्रयोग भएका ओएलइडी स्क्रिन पनि सामसुङले नै निर्माण गरेको हो । तरपनि कम्पनीको विक्री दर योपटक एघार प्रतिशत अर्थात ५२.५ अर्ब डलरले घट्ने अनुमान गरिएको छ । 

२०१८ को अन्तिम तीन महिनाको व्यापारिक नाफा ९.६ अर्ब डलर हुन सक्ने बताइएको छ । पछिल्लो वर्ष भने सामसुङले यही समयमा १३.५ अर्ब डलर नफा कमाएको थियो । यस्तोमा कम्पनीको खराब प्रदर्शनीले २०१९ को पहिलो तीन महिनाको आम्दानीमा पनि नकारात्मक प्रभाव पार्ने विश्लेषकहरुको अनुमान छ । यसकारण कठिन व्यापारिक परिस्थितिका बीच वर्षको अन्त्य तिर मात्र व्यापारमा सुधार आउन सक्ने सामसुङले बताएको हो । यसमा कम्पनीले लन्च गर्न लागेको नयाँ फाइभजी टेक्नोलोजी र फोल्डेबल स्मार्टफोनले ठूलो योगदान पुर्याउने सामसुङको अपेक्षा छ । 

यता विश्लेषकहरुले भने सामसुङको यस्तो कमजोर बयानबारे कुनै आश्चर्य नभएको जनाएका छन् । भारत लगायत दक्षिण पूर्वी एसियाको बढ्दो स्मार्टफोन बजारमा चिनियाँ कम्पनीहरुले सामसुङको पहुँच सिमित बनाइरहेको हुँदा व्यापारमा गिरावट आउनु स्वाभाविक रहेको सिंगापुर स्थित आइडीसीका विश्लेषक किरनजित कौर बताउँछन् । आईडीसीको अहिलेको रिपोर्ट अनुसार सामसुङले अझैपनि विश्वव्यापी रुपमा सबैभन्दा बढी उत्पादन विक्री गर्ने गरिरहेको छ तर २०१८ को तेस्रो क्वाटरमा भने व्यापारमा १३ प्रतिशत गिरावट देखिएको हो । उता चिनियाँ स्मार्टफोन निर्माता हुवावेको व्यापारमा भने ३३ प्रतिशत वृद्धि भएको पाइएको थियो । सामसुङले अब २०१८ को अन्तिम तीन महिनाको व्यापारिक नतिजाबारे जनवरी अन्तिममा मात्र खुलासा गर्नेछ ।  सिएनएन

प्रतिकृया दिनुहोस
ad