काठमाडौं । मानव तस्करीको आरोप लागेकी अष्ट्रेलियाका लागि नेपाली राजदूत लक्की शेर्पालाई बर्खास्त गरिए/नगरिएको बारेमा अन्योल उत्पन्न भएको छ । सोमबारको मन्त्रिपरिषद् बैठकले शेर्पालाई बर्खास्त गरेको भनेर समाचार प्रकाशित भएपनि परराष्ट्र मन्त्री प्रदीप ज्ञवालीले मंगलबार बिहान बाह्रखरीसँगको कुराकानीमा भने, ‘‘त्यो बारेमा निर्णय भएको छैन,’’ कसरी समाचार आयो त भन्ने जिज्ञासामा मन्त्री ज्ञवालीले भने, ‘‘त्यो त समाचार लेख्नेलाई नै सोध्नुपर्ला ।’’
विवादमा तानिएकी राजदूत शेर्पालाई परराष्ट्र मन्त्रालयले स्पष्टीकरण सोध्नुका साथै छानविन समितिसमेत गठन गरेर बयान लिएको थियो । परराष्ट्र मन्त्रालयद्वारा गठित समितिले शेर्पासँग बयान लिँदै परराष्ट्र मन्त्रालयलाई प्रतिवेदन बुझाएको थियो । शेर्पा विवादमा तानिएपछि सत्तारुढ नेपाल कम्युनिष्ट पार्टी (नेकपा)का अध्यक्ष तथा प्रधानमन्त्री केपी शर्मा ओली र अर्का अध्यक्ष पुष्पकमल दाहालले पनि अष्ट्रेलियाको राजदूत अब कसलाई बनाउने भन्ने सम्मको तयारी गरिसकेको स्रोतले बताएको छ ।
अष्ट्रेलियाका लागि नेपाली राजदूत शेर्पामाथि उनकै चालक वाड्चु शेर्पाले पैसा लिएर आफूलाई अष्ट्रेलिया ल्याएको आरोप लगाएपछि उनी विवादमा तानिएकी हुन् । त्यसपछि मन्त्रालयले शेर्पाका विषयमा लागेको आरोपमाथि सत्यतथ्य बुझ्न उनलाई काठमाडौं बोलाएको थियो । शेर्पाले प्रधानमन्त्रीलाई भेटेर आफूलाई लागेको आरोपका बारेमा सार्वजनिक रुपमा स्पष्ट पार्न चाहेको भनेर प्रधानमन्त्री ओलीसँग समेत अनुमति मागेकी थिइन् ।
मन्त्रिपरिषद्ले बर्खास्तको निर्णय गरेको भन्ने चर्चा चलेपछि शेर्पाले विभिन्न मन्त्री र परराष्ट्र मन्त्रालयका अधिकारीहरुसँग समेत आज बिहान जिज्ञासा राखेकी थिइन् । तर, उनलाई परराष्ट्रका अधिकारीहरुले मन्त्रालयबाट त्यस सम्बन्धी कुनै पनि विषय मन्त्रिपरिषद्मा नगएको जानकारी गराएका थिए । शेर्पाले मंगलबार बिहान बाह्रखरीसँगको कुराकानीमा भनिन्, ‘‘मैले सबैलाई सोधिसकेँ । उहाँहरुले त्यस्तो निर्णय भएको छैन भन्नुभयो । कसरी समाचार आयो अचम्ममा परेकी छु । ’’ उनले आफूले प्रधानमन्त्री ओली र नेकपाका अर्का अध्यक्ष प्रचण्डलाई भेटेर राजीनामा दिएको भन्ने खालको अर्को समाचार पनि गलत भएको बताइन् । ‘‘मैले कसैलाई राजीनामा दिएको छैन ।’’ उनले यसरी जे पायो त्यही समाचार सञ्चार माध्यममा आउनु गैरकानुनी भएको समेत बताइन् ।
उनले आफूलाई लागेको आरोपका बारेमा चाँडै पत्रकार सम्मेलन गरेर सार्वजनिक गर्ने पनि जनाइन् । ‘‘आफ्ना कुरा राख्नका लागि पत्रकार सम्मेलन गर्न प्रधानमन्त्रीले पनि अनुमति दिनुभएको छ,’’ उनले भनिन् । उनले आफूले आज एक चरण मन्त्री देखि परराष्ट्र मन्त्रालयका अधिकारीहरुलाई भेटेर स्थान तय गरी पत्रकार सम्मेलन गरेर आफ्ना कुरा सार्वजनिक गर्ने बताइन् ।