काठमाडौं । सडक दुर्घटना न्यूनीकरण गर्न सरकारले लामो दुरीका सवारीमा अनिवार्य दुई चालक रहनुपर्ने व्यवस्था गरेको छ । यसका लागि ट्राफिक प्रहरी, यातायात व्यवस्था विभाग र यातायात व्यवसायीसँग आवश्यक छलफल गरी भौतिक पूर्वाधार तथा यातायात मन्त्रालयले तयारी सुरु गरेको छ ।
लामो दुरीमा चल्ने सवारी साधन एउटै चालकले हाँक्दा निद्राका कारण सवारी दुर्घटनामा पर्ने गरेको ट्राफिक प्रहरीको निष्कर्ष छ । सोमबार सिंहदरबारमा बसेको संसदीय विकास तथा प्रविधि समितिको बैठकमा मन्त्री रघुवीर महासेठले मन्त्रालयले यसको तयारी सुरु गरेको बताए । 
“लामो दुरीमा दुई चालक अनिवार्य गरेपछि हालको सवारी दुर्घटनामा केही कमी आउने आकलन गरिएको छ । काँकडभिट्टा–काठमाडौं, धनगढी–काठमाडौंजस्ता रुटमा चल्ने सवारीमा चाँडै दुई चालकको व्यवस्था गरिने छ,” मन्त्री महासेठले भने ।
लामो रुटमा हाल रिफ्रेस सेन्टर नभएकाले यात्रु र चालकलाई यात्रा असहज भएको बैठकमा सांसदहरुले बताएका थिए । मन्त्री महासेठले लामो दुरीका चालक र यात्रुलाई सहज हुने गरी रिफ्रेस सेन्टर स्थापना गरिने पनि बताए ।
“खाजा खाने, मुख धुने व्यवस्था रिफ्रेस सेन्टरमा हुनेछ । जसले चालक र यात्रुलाई यात्रामा सहजता हुने छ,” मन्त्री महासेठले भने ।