हत्या, बलात्कार, बेपत्ता पारिएकोजस्ता जघन्य अपराधको सन्देह हुनेबित्तिकै प्रहरी आफैँले कारबाही अगाडि बढाउनुपर्ने हो । तर, कथित ‘लिटिल बुद्ध’ रामबहादुर बमजनविरुद्ध भने सार्वजनिकरूपमै जघन्य अपराधमा संलग्न भएको आरोप लगाइँदा र किटानी जाहेरी दिँदासमेत प्रहरीले कारबाही सुरु गरेको देखिएन । बमजन विभिन्न अपराधमा संलग्न भएको आरोप सञ्चार माध्यममार्फत् लगाइन थालेको केही वर्ष नै भइसक्यो । केही दिन पहिले त एक महिलाले आफूलाई बमजनले बलात्कार गरेको आरोप पत्रकार सम्मेलन गरेरै लगाइन् भने बमजनका अनुयायीले आरोप झुटा भएको दाबी गरे । पत्रपत्रिकामा बमजनमाथि लागेका आरोपहरू प्रकाशित हुन थालेपछि धेरैले न्यायको माग गर्न थालेका छन् । सार्वजनिक भएका घटनाहरूले हाल जेलमा रहेका भारतका केही कुख्यात बाबाहरूको झल्को लाग्छ ।  

आरोप लाग्ने वा लगाइनेबित्तिकै कसुरदार ठहर गर्नु न्यायसंगत हुँदैन । तर, कुनै धार्मिक वा अरू आवरणमा रहेको व्यक्ति भन्दैमा आरोपलाई छानबिनैै नगरी खारेज गर्नु पनि न्यायोचित होइन । संगठित समूहका सामु व्यक्ति कमजोर हुन्छ । त्यसैले समूहले समेत व्यक्तिमाथि अन्याय गर्न नसकोस् भनेर समाज र राज्यको संरचनालाई व्यक्तिले स्वीकार गरेको हो । कुनै पार्टीको नेता वा मठ, गुम्बा, गिर्जाको प्रमुख वा अरू कुनै संगठित समूहको सदस्य भएकै कारण व्यक्ति विशेषले अत्याचार गर्ने र राज्यको कानुन पालना गराउने निकाय त्यसमा मौन रहने हो भने राज्य र कानुनप्रति जनविश्वास गुम्छ । अतः प्रहरीले यस विषयमा छानबिन थालेर त्यसको सार्वजनिक जानकारी दिनु आवश्यक देखिन्छ । 

बमजनका अनुयायीले दाबी गरेजस्तो आरोप असत्य हो भने पनि प्रहरीले छानबिन गर्नु जरुरी हुन्छ । पहिलो त हत्या, बलात्कारजस्ता सरकारवादी फौजदारी मुद्दामा किटानी जाहेरी परेपछि प्र्रहरीले अनुसन्धान गरी मुद्दा चलाउनै पर्ने प्रावधान छ । त्यसमाथि पीडित भनिएकामात्रै हैन पीडक भनिएका बमजनकै अनुयायीले पनि प्रहरीले छानबिन गरोस् भन्ने माग गरिसकेका छन् । कुनै सामान्य व्यक्तिमाथि यति धेरै जनाले यति गम्भीर आरोप लगाएर किटानी जाहेरी दिएको भए प्रहरीले यसरी नै मौन रहन्थ्यो त ? तपस्वीको भेषमा हुँदैमा रामबहादुर बमजनमाथि अर्कै व्यवहार गर्नु भेदभाव हो । निर्मला बलात्कार तथा हत्या काण्डमा बदनाम भइरहेको नेपाल प्रहरीलाई थप विवादास्पद र कमजोर हुन नदिन पनि रामबहादुर बमजनमाथि कारबाही सुरु गर्नु आवश्यक देखिन्छ । मुलुकमा विधिको शासन भएको देखाउने यस्तै अवसरमा त हो । प्रहरीले छानबिन थालेमा बमजनकै अनुयायीले पनि त्यमा सहयोग गर्नुपर्छ । यस्तो प्रवृत्तिलार्इ उपेक्षा गर्दा ठूलो अनीष्ट हुनसक्छ ।