काठमाडौं ।शरद भेषावकर र प्रदीप ऐरीको अर्धशतकीय साझेदारी प्रेरित भैरहवा ग्लाडियटर्सले बुधबार चितवन टाइगर्सलाई ४ विकेटले पराजित गर्दै ईपीएल क्वालिफायर्समा काठमाडौं किंग्स—११ सँगको भेट पक्का गरेको छ ।
कीर्तिपुरस्थित त्रिवि क्रिकेट मैदानमा टस हारेर ब्याटिङका लागि निम्त्याइएको चितवन टाइगर्सले निर्धारित २० ओभरमा ८ विकेट गुमाएर १ सय ३९ रनको योगफल बनाएको थियो । १ सय ४० रनको लक्ष्य पछ्याएको भैरहवाले १८.२ ओभरमा ६ विकेट गुमाएर पूरा गरेको थियो । विजयी भैरहवाले अब बिहीबार हुने दोस्रो क्वालिफायरमा काठमाडौं किंग्स–११ विरुद्ध फाइनलका लागि प्रतिस्पर्धा गर्नेछ । 
कमलसिंह ऐरीले दुई र ललितसिंह भण्डारीले एक विकेट लिएपछि भैरहवाले राम्रो सुरुआत गर्न सकेको थिएन । मोहम्मद नाभेद र रवि इन्दर सिंहले समान ४ रन बनाएर आउट हुँदा रायन टेन डोस्काटे शून्यमा पवेलियन फर्किएका थिए । तर ओपनर प्रदीप ऐरी र कप्तान शरद भेषावकरले चौथो विकेटका लागि ५६ रनको साझेदारी गर्दै भैरहवाको इनिङ उकासेका थिए । ३८ बलमा ६ चौकासहित ४२ रन बनाएका प्रदीपलाई कमलसिंह ऐरीले विकेटकिपर जोन सिम्पसनमार्फत् क्याच गरे । २९ रन बनाएका कप्तान शरदले पनि दीपेन्द्रसिंह ऐरीको बलमा पृथु बास्कोटालाई क्याच थमाए । लगत्तै आरिफ शेख पनि आउट भएपछि भैरहवा दबाबमा परेको थियो । १४.२ ओभरमा आरिफ आउट हुँदा भैरहवा ९१–६ को अवस्थामा थियो । त्यसपछि रोहितकुमार पौडेल र कुशल मल्लले सातौं विकेटका लागि ४९ रनको साझेदारी गर्दै ४ विकेटको जित दिलाएका थिए । रोहितकुमार पौडेलले १४ बलमा अविजित २४ रन बनाउँदा १३ बल खेलेका कुशल २७ रनमा अविजित रहे ।
त्यसअघि दीपेन्द्रसिंह ऐरीले अर्धशतक बनाएपछि कीर्तिपुरस्थित त्रिवि क्रिकेट मैदानमा टस हारेर ब्याटिङका लागि निम्त्याइएको चितवन टाइगर्सले निर्धारित २० ओभरमा ८ विकेट गुमाएर १ सय ३९ रन बनाएको थियो । दीपेन्द्रसिंहले ४५ बलमा १ छक्का र ६ चौकासहित ५६ रन बनाए । यससँगै दीपेन्द्रसिंह ईपिएलमा धेरै रन बनाउने दोस्रा खेलाडी बनेका छन् । दीपेन्द्रसिंहले २ सय ३१ रन बनाएका छन् । शीर्ष स्थानमा २ सय ७३ रन बनाएका भैरहवाका रवि इन्दर सिंह छन् । चितवनका ओपनरले राम्रो सुरुआत दिन नसके पनि दीपेन्द्रसिंहले टोलीको इनिङ उकासेका थिए । 
ओपनर पाउल स्टर्लिङ १४ रन बनाएर आउट हुँदा सन्दीप सुनार ४ र पृथु बास्कोटा शून्यमा आउट भए । ४.३ ओभरमा पृथु आउट हुँदा चितवन ३–२४ को स्थितिमा थियो । जोन सिम्पसन र दीपेन्द्रसिंह ऐरीले चौथो विकेटका लागि ३१ रनको साझेदारी गर्दै चितवनको इनिङ उकास्ने प्रयास गरेका थिए । सिम्पसन २ चौकासहित १४ रन बनाएर आउट भए । त्यसपछि दीपेन्द्रसिंह ऐरीले भिम सार्कीसँग पाँचौं विकेटका लागि २० रनको साझेदारी गरे । दीपेन्द्रले जर्ज स्कटसँग छैटौं विकेटका लागि २० तथा कमलसिंह ऐरीसँग सातौं विकेटका लागि ३१ रनको साझेदारी गरेका थिए । दीपेन्द्रलाई मोहम्मद नाभीदले कृष्ण कार्कीमार्फत् क्याच गराएका थिए । कमलसिंहले १३ रन बनाए ।
भैरहवाका नाभीदले ३ विकेट लिँदा अभिनास बोहराले २ विकेट लिए । रायन टेन डोसचट, कृष्ण कार्की र भुवन कार्कीको नाममा १–१ विकेट रह्यो ।