काठमाडौं । पूर्व बालसैनिक लेनिन बिष्टले आफूमाथि गृह मन्त्रालयले अनावश्यक आरोप लगाएको बताएका छन् । उनी गएको भदौ ८ गते  एउटा कार्यक्रममा भाग लिन थाइल्याण्डको बैंकक जाने क्रममा त्रिभुवन अन्तर्राष्ट्रिय  विमानस्थलबाट फिर्ता गरिएकोमा त्यसको विरुद्धमा उनले गएको भदौ १५ गते सर्वोच्च अदालतमा रिट हालेका थिए । त्यसबारेमा पेसी भोलि पुस ५ गतेका लागि तोकिएको छ । 
रिट परेपछि सर्वोच्चले कारण देखाउन दिएको आदेश बमोजिम गृहमन्त्री रामबहादुर थापाले मंसिर २९ गते पठाएको जवाफमा लेनिनको विरुद्धमा उजुरी परेका कारण रोकिएको जिकीर गरिएको छ । तर, गृह मन्त्रालयमा उजुरी गराउन लाउनेलाई गृह मन्त्रालयले जागिर लगाइदिने लगायतका प्रलोभन दिएको लेनिनले आरोप लगाएका छन् । 
उजुरीमा हस्ताक्षर गर्ने अनुपम कार्की नामका एक व्यक्तिले लेनिनलाई नै पत्र पठाएर आफूले त्यो कागजमा लगाइएको आरोपबारेमा थाहै नभई गएको भदौ १० गते गृह मन्त्रालयमा हस्ताक्षर गरेको जनाएका छन् । लेनिनको मामिलालाई लिएर प्रधानमन्त्री केपी शर्मा ओलीले गृहमन्त्री रामबहादुर थापासँग समेत जवाफ मागेका थिए । गृहमन्त्री थापाले सर्वोच्चलाई पठाएको पत्रमा भने लेनिनलाई फिर्ता गरिनु उपयुक्त नै भएको दाबी गरिएको छ ।