न्यूयोर्क । संयुक्त राष्ट्रसंघले सन् २०१८को लागि संयुक्त राष्ट्र संघीय मानवअधिकार पुरस्कार पाकिस्तानका कानुन व्यवसायी तथा अधिकार अभियन्ता आस्मा जहाँगिरलाई दिएको छ । सो पुरस्कार आस्माकी छोरी मुनिजाई जहाँगिरलाई हस्तान्तरण गरिएको छ । 
सो अवार्ड व्यक्तिगत र संस्थागत रुपमा मानवअधिकारको क्षेत्रमा काम गर्नेलाई दिइने गरेको छ । उनी सो पुरस्कार प्राप्त गर्ने चार जना मध्येकी एक हुन् ।  पुरस्कार हस्तान्तरण कार्यक्रम मंगलबार संयुक्त राष्ट्र संघको मुख्यालय न्यूयोर्कमा भएको थियो । 
सो पुरस्कार पाउने अन्यमा तान्जानियाकी रेबेका ग्युमी, ब्राजीलको जनजाति समुदायका अभियन्ता जोइना ओपिचाना र आयरल्याण्डको मानवअधिकार संगठन फ्रन्ट लाइन डिफेन्डर्स रहेका छन् । पाकिस्तानी अभियन्ता आस्माको गएको फेब्रुवरी महिनामा निधन भएको थियो । 
(एजेन्सी)