काठमाडौं । मन्त्रिपरिषद्लाई जानकारी नदिई विदेश भ्रमण गरेपछि प्रधानमन्त्री केपी शर्मा ओलीको निर्देशनमा सरकारका मुख्य सचिव लोकदर्शन रेग्मीले तीन जना सचिवसँग स्पष्टीकरण लिएको खुलेको छ । मुख्य सचिव रेग्मीले भौतिक पूर्वाधार तथा यातायात सचिव मधुसुदन अधिकारी, खानेपानी सचिव गजेन्द्रकुमार ठाकुर र गण्डकी प्रदेशका प्रमुख सचिव लक्ष्मीराम पौडेलसँग स्पष्टीकरण लिएका हुन् ।
प्रधानमन्त्री तथा मन्त्रिपरिषद्को कार्यालय उच्च स्रोतका अनुसार सरकारलाई जानकारी नदिई भौतिक पूर्वाधार तथा यातायात सचिव अधिकारी भारत, खानपानी सचिव ठाकुर अमेरिका र गण्डकी प्रदेश प्रमुख सचिव पौडेल चीन गएका थिए । उक्त कुरा प्रधानमन्त्रीले थाहा पाएपछि मुख्स सचिवमार्फत् स्पष्टीकरण लिएका हुन् ।
“मन्त्रिपरिषद्लाई जानकारी नदिई तीन सचिवले विदेश भ्रमण गरेपछि मुख्यसचिवज्यूले ती सचिवहरुसँग स्पष्टीकरण लिनुभएको छ,” प्रधानमन्त्री तथा मन्त्रिपरिषद्को कार्यालय स्रोतले भन्यो । स्पष्टीकरण केही दिनअघि लिइएको स्रोतले जनायो ।
सचिवहरुले वैदेशिक भ्रमण व्यवस्थापन निर्देशिका, २०७५ को उल्लंघन गर्दै विदेश भ्रमण गरेपछि स्पष्टीकरण लिइएको स्रोत बताउँछ । सरकारी कर्मचारीले अनावश्यक विदेश भ्रमण गर्दा राज्यकोषबाट करोडौं रुपैयाँ खर्च हुने र जस्तोसुकै कार्यक्रममा उच्चपदस्थ सरकारी अधिकारी सहभागी हुँदा देशकै प्रतिष्ठामा आँच आउने भएकोले यसलाई रोक्न सरकारले यसै वर्षको सुरुमा वैदेशिक भ्रमण व्यवस्थापन निर्देशिका जारी गरेको थियो ।
आर्थिक वर्ष २०७४–०७५ मा ५ हजारभन्दा बढी सरकारी कर्मचारीले विदेश भ्रमण गरेका थिए । उक्त भ्रमणमा राज्यकोषबाट करिब २ अर्ब रुपैयाँ खर्च भएको थियो । त्यसपछि सरकारले मितव्ययिता अपनाउने भन्दै निर्देशिका र कार्यविधि ल्याएको थियो । कार्यविधिमा स्पष्ट रुपमा सचिव गर्ने विदेश भ्रमणलाई अनिवार्य रुपमा मन्त्रिपरिषद्ले स्वीकृत गर्नुपर्ने उल्लेख छ । तर तीन जना सचिवहरु मन्त्रीपरिषद्को निर्णयबिनै विदेश भ्रमण निस्केको स्रोतले जनायो ।
“नेपाल सरकारका मुख्यसचिव, सचिव वा विशिष्ट श्रेणीका अधिकृत वा सो सरहका पदाधिकारीको वैदेशिक भ्रमण स्वीकृत गर्ने पदाधिकारी नेपाल सरकार, मन्त्रिपरिषद्,’ वैदेशिक भ्रमण व्यवस्थापन निर्देशिका, २०७५ को दफा ५ मा उल्लेख छ । स्पष्टीकरण लिइसकेको भएपनि कारवाही के गर्ने भन्ने विषयमा निर्णय लिइनसकिएको स्रोतले बतायो ।
याे पनि पढ्नुहाेस्
जनताको करमा भीआईपीको घुमघाम
४ महिनामा १५७६ कर्मचारी ६२२२ दिन विदेशमा, घुमफिरमा ३७ करोड स्वाहा