काठमाडौं । पूर्व प्रधानमन्त्री डा. तुलसी गिरीको मंगलबार बिहान ९३ वर्षको उमेरमा  निधन भएको छ । आफ्नै निवास बूढानीलकण्ठ भिल्लामा उनको निधन भएको पारिवारिक स्रोतले बताएको छ । उनी लामो समयदेखि कलेजो सम्बन्धी रोगबाट पीडित रहेका थिए । उनलाई हालैमात्रै भैंसेपाटीस्थित मेडिसिटी अस्पतालमा उपचारार्थ लगिएकोमा पछि घर फिर्ता गरिएको थियो । उनी नेपाली कांग्रेसका नेता बीपी कोइरालासँगै काम गरेको भए पनि २०१७ सालको कदममा राजा महेन्द्रलाई उनले साथ दिएका थिए । 

पछि तत्कालीन राजा ज्ञानेन्द्रले माघ १९को कदम चालेपछि बनाएका दुई उपाध्यक्षमा एक जना डा. गिरी थिए भने अर्का कीर्तिनिधि बिष्ट थिए । २०३६ सालमा तत्कालीन राजा वीरेन्द्रले जनमत संग्रह घोषणा गरेकोमा त्यसमा असहमति जनाउँदै उनी श्रीलंका गएका थिए ।

उनी राजा ज्ञानेन्द्रको शासनकालमा उपाध्यक्ष रहँदा गृहमन्त्री रहेका राप्रपाका अध्यक्ष कमल थापाले ट्वीटमार्फत डा. गिरीलाई श्रद्धाञ्जली दिएका छन् । 

डा. गिरी चिकित्सक भएर पनि चिकित्सा पेशा नअपनाएर राजनीतिमा होमिएका व्यक्तित्व हुन्  । डा. गिरीको राजनीतिक जीवनको थालनी मूलतः तत्कालीन कांग्रेस नेता विश्ववन्धु थापाको संगतमा आएपछि अगाडि बढेको मानिन्छ । तथापि, डा. गिरीको पारिवारिक पृष्ठभूमि राजनीतिक नै रहेको थियो ।