काठमाडौं । राजधानीको ताहाचलस्थित प्रमुख पाँचतारे होटल सोल्टीले आर्थिक वर्ष २०७४–७५ मा १ अर्ब ६६ करोड ४२ लाख रुपैयाँ आम्दानी गरेको छ । आयकरपछिको खुद मुनाफा २७ करोड ९२ लाख ३७ हजार पुगेको होटलले जनाएको छ ।
होटल सञ्चालक समितिले प्रस्ताव गरेअनुसार सेयरधनीलाई चुक्ता पुँजीको १६ दशमलव ३१ प्रतिशतका दरले नगद लाभांश दिने घोषणा सोल्टीले गरेको छ । आगामी पुस २६ गते हुने होटलको ४४औं वार्षिक साधारणसभाले उक्त प्रस्ताव पारित गर्नेछ ।
होटलका अनुसार गत आर्थिक वर्ष २०७४–७५ मा १ अर्ब ३० करोड १२ लाख ८९ हजार रुपैयाँ कूल खर्च भएको छ । उक्त अवधिमा सञ्चालन मुनाफा ३६ करोड २९ लाख १६ हजार रुपैयाँ भएको थियो भने ७ करोड ३ लाख रुपैयाँबराबर आयकर तिरिएको थियो ।
होटलको खुद मुनाफा भने १ सय १ दशमलव २७ प्रतिशतले वृद्धि भएको छ । अघिल्लो आर्थिक वर्ष १३ करोड ८७ लाख ३५ हजार रुपैयाँमात्र खुद मुनाफा गरेको थियो । सञ्चालन मुनाफा भने १८ करोड ६ लाख रुपैयाँ थियो ।
होटलले अघिल्लो आर्थिक वर्ष २०७३–७४ मा भने १ अर्ब ६४ करोड ५ लाख १९ हजार रुपैयाँ कूल आम्दानी गरेको थियो । यो भनेको गत आर्थिक वर्षको दाँजोमा १ दशमलव ४४ प्रतिशतले बढी हो ।