काठमाडौं । यही शनिबारबाट हुने नेपाली कांग्रेसको महासमिति बैठकको सम्पूर्ण तयारी पूरा भएको छ । बैठकको पूर्वसन्ध्यामा आज (बिहीबार) आयोजित पत्रकार सम्मेलनमा कांग्रेस प्रवक्ता विश्वप्रकाश शर्माले बैठकको सबै तयारी पूरा भएको जानकारी दिए । 
देशविदेशका गरी १६ सय प्रतिनिधि सहभागी हुने महासमिति बैठक शनिबार बिहान ११ बजे भृकृटीमण्डपमा उद्घाटन गरिने र अपरान्हबाट बन्द सत्र सुरु हुनेछ । पुस ३ गतेसम्म चल्ने बैठकमा राजनीतिक, सांगठनिक, विधान संशोधनलगायतका प्रतिवेदनमाथि गम्भीर छलफल गरिने प्रवक्ता शर्माले बताए । 
शर्माले भने, ‘‘महासमिति बैठकले आवश्यक परे नेतृत्व र नीति परिवर्तन गर्ने क्षमता राख्छ । यो बैठकबाट हामीले पुरानो दलबाटै नयाँ ऊर्जा प्राप्त गर्नेछौं ।’’ बैठकमा काग्रेसको इतिहाससँग जोडिएका तस्बिर प्रदर्शनीदेखि महासमितिको लोगो रहेको सेल्फी जोनसमेत हुनेछ ।