काठमाडौं । नेपाल, भारत र भुटानका खेलाडीको सहभागितामा पुसको अन्तिममा मैत्रीपूर्ण बक्सिङ प्रतियोगिता हुने भएको छ । बोसिगाउँ बक्सिङ क्लबको आयोजनामा तीन देशबीच मैत्रीपूर्ण बक्सिङ प्रतियोगिता हुन लागेको हो । 
पुस २५ र २६ गते चन्द्रागिरी नगरपालिकामा हुने प्रतियोगितामा भारतको हरियाणा राज्यको बक्सिङ टोली, भुटानको राष्ट्रिय टोली र नेपालबाट ‘ए’ र ‘बी’ गरी दुई टोली सहभागि हुने आयोजक बोसिगाउँ क्लबका अध्यक्ष दीपक महर्जनले जानकारी दिए । 
काठमाडौंमा आयोजित पत्रकार सम्मेलनमा अध्यक्ष महर्जनले सर्वाधिक सफल खेल भए पनि पछिल्लो समय अपेक्षाकृत नतिजा निकाल्न नसकेको अवस्थामा खेलाडीको विकासका लागि प्रतियोगिता गर्न लागेको बताए । उनले घरेलु मैदानमा हुने १३औं दक्षिण एशियाली खेलुकदको तयारीका लागि यो प्रतियोगिताले सहयोग पुग्ने बताए । नेपाल बक्सिङ संघका अध्यक्ष राम अवालेले बक्सिङको विकासका लागि प्रतियोगिता भइरहनु पर्ने बताए । 
पुरुष र महिला गरी ११ तौल समूहमा हुने प्रतिस्पर्धामा प्रत्येक टिमबाट ११ जना खेलाडीले सहभागिता जनाउने आयोजकले बताएको छ । पुरुषतर्फ ४९, ५२, ५६, ६०, ६९ र ७५ केजीमा प्रतिस्पर्धा हुनेछ भने महिलातर्फ ४८, ५१, ५४ र ६० केजी तौल समूहमा प्रतिस्पर्धा हुने क्लबका अध्यक्ष महर्जनले बताए । अन्तर्राष्ट्रिय बक्सिङ महासंघ (एआइबा)को नियम अनुसार हुने प्रतियोगिताको विजेताले १५ हजार रुपैयाँ उपविजेताले १० हजार र तेस्रो हुने दुई खेलाडीले जनही ५ हजार रुपैयाँका दरले पुरस्कार पाउनेछन् ।