काठमाडौं । पूर्वअर्थमन्त्री तथा नेपाली कांग्रेस नेता डा. रामशरण महतले सरकारको फजुल खर्च गर्ने प्रवृत्ति बढेको बताएका छन् । मिडिया इन्टरनेसनलले आयोजना गरेको एक कार्यक्रममा बोल्दै डा. महतले सरकार पपुलारिटी कमाउन आफ्नो क्षमताको ख्यालै नगरी प्रचारमुखी बनेको आरोप लगाएका हुन् ।

सरकारले मितव्ययिता शब्द नै भुलेको उनको आरोप छ । राजनीतिक संक्रमणको अभावको अन्त्य भएपनि योजना कार्यान्वयनको अन्त्य नभएको बताउँदै नेता महतले ‘समृद्ध नेपाल, सुखी नेपाली’ को नारा लगाउँदा जनताले पत्याएको दुई तिहाइको म्यान्डेट बिर्सिएको दाबी गरे ।

सरकारको नौ महिनाको उपलब्धि ‘हुने बिरुवाको चिल्लो पात’ नभएको बताउँदै उनले यो उपलब्धिले नेपाली जनताको भविष्य अन्योलमा रहेको दाबी उनले गरे । उनले भने, “यो समयमा सरकारले आफ्नो जिम्मेवारीको प्राथमिकता पहिचान गर्न सकेन । विकास जुन गतिले हुनुपर्ने भएन । कुरा ठूला भए, सपना ठूला देखाइए । तर, देखाइएका सपना जनताको लागि संकट बने ।”

सुहाउँदो जनशक्ति तथा सुशासनको अभावले जिम्मेवारी र सरकारी ढुकुटीको रकमको बाँडफाँटमा समस्या निम्तिएको उनको दाबी छ । 

सरकारको फजुल खर्चे प्रवृत्ति जोड्ने क्रममा उनले उच्च आहोदाको विदेशी पाहुनाको लागि गेस्ट हाउस, मन्त्री क्वाटर आदि सबै सरकारको ढुकुटि स्वाहा पार्ने अभियान भएको उनको आरोप छ । वर्षौंदेखिको सरकारी योजनाको श्रेय आफ्नो नाममा पार्ने ठूला तस्बीर पोलपोलमा झुन्ड्याएको उनको आरोप छ ।

सरकारद्धारा ठूलठूला कुरा गरेर आशा देखाइए तापनि वास्तविक समस्या बुझेर समाधान गर्नेतर्फ ध्यान नजाँदा संरचनागत परिवर्तनका वावजुद पनि मुलुकको आर्थिक अवस्थामा परिवर्तन आउन नसकेको उनको धारणा छ ।

उनले थपे, “व्यवसायी सरकारको विरोधमा छन् । सुशासनको अभाव छ । आर्थिक वृद्धिको ठूला सपना यस्तो प्रणालीले कसरी सम्भव होला ?” सरकार राजनीतिक स्वार्थमा लिप्त हुँदा आफू कुन विकास नीति अवलम्बन गर्दैछु भन्नेसम्म भुलेको उनको दाबी छ ।

सोही अवसरमा उनले अर्थतन्त्रको प्रमुख सूचकहरु मध्येको एक रहेको सेयर बजार नौ महिनासम्म ३ सय अंकले घट्नु नराम्रो संकेत भएको बताए ।

फाइल तस्बिर