कञ्चनपुर । बलात्कारपछि हत्या गरिएकी कञ्चनपुरको भीमदत्तनगर–२ की १३ वर्षीया किशोरी निर्मला पन्तको आज (बुधबार) जन्मदिनको अवसरमा सडकमै होम गरिएको छ । गत साउन ११ गते मृत अवस्थामा फेला परेकी निर्मलाको आत्माको शान्तिको लागि भन्दै जिल्ला प्रशासन कार्यालय कञ्चनपुर अगाडि सडकमै होम गरिएको हो ।
होममा निर्मलाकी आमा दुर्गादेवी, नागरिक समाज तथा स्थानीय र अधिकारकर्मीको सहभागिता रहेको थियो । हत्यारा पत्ता लगाउन र घटनाको निष्पक्ष छानबिनका लागि दबाबस्वरुप सडकमै होम गरिएको अधिकारकर्मी शारदा चन्दले बताइन् । निर्मलाको फोटो राखेर धार्मिक परम्पराअनुसार पण्डित केशवप्रसाद उपाध्यायले पूजा गरेका थिए ।
उता, निर्मला हत्यामा संलग्न रहेको आशंकामा पक्राउ परेका भीमदत्तनगर–१८ भगतपुरका विशाल चौधरी र प्रदीप रावलका आफन्तले कञ्चनपुरको महेन्द्रनगरमा प्रदर्शन गरेका छन् । प्रहरीले प्रदीप र विशाललाई फसाउन खोजेको आरोप उनीहरुको छ । गत साउन १० गते साथीको घरमा गएकी निर्मला साउन ११ गते घरनजिकै रहेको उखुबारीमा मृत अवस्थामा फेला परेकी थिइन् । बलात्कारपछि निर्मलाको हत्या भएको पुष्टि भए पनि घटनामा संलग्नको पहिचान हुन सकेको छैन । अनुसन्धानका क्रममा हालसम्म १० जनाको डीएनए परीक्षण गरिसकिएको छ ।
