काठमाडौं । यसअघिको दोस्रो संस्करणमा एभरेष्ट प्रिमियर लिग (ईपीएल) को विजेता टिम विराटनगर वारियर्सले २१ लाख नगद पुरस्कार पाएको थियो । कीर्तिपुरस्थित त्रिवि क्रिकेट मैदानमा प्रतियोगिताको तेस्रो संस्करण सुरु भएको आज पाँचौं दिन हो । तर यसपाली आयोजकले अहिलेसम्म पुरस्कार राशि सार्वजनिक गरेको छैन ।
प्रत्येक वर्ष पुरस्कारमा वृद्धि गर्ने परम्पराजस्तै रहेको नेपालमा ईपीएल संयोजक आमिर अख्तरले आफू भने परम्परागत रुपमा पुरस्कार राशि घोषणा गर्ने मनसायमा नरहेको बताएका छन् ।
छिट्टै पुरस्कार राशि घोषणा गर्ने बताउँदै आएका अख्तर भन्छन् “प्रतियोगिता गर्न पुरस्कार घोषणा गर्नुपर्छ भन्ने छैन । हामीले प्रतियोगिताको आकर्षक बढाउने हो । विश्वका चर्चित लिगहरुमा पनि पुरस्कार राशि घोषणा गरिन्न । म समय आएपछि पुरस्कार राशि घोषणा गर्छु । तर, कसैको दबाबमा आएर होइन ।”
अख्तरले पुरस्कार राशि सार्वजनिक गर्न कसले दबाब दियो भन्ने चाहिँ खुलाएनन् । प्रतियोगिता अघिल्लो वर्षको तुलनामा थप व्यवस्थित र भव्य भएको बताउँदै उनले त्यसलाई स्वभाविक र योजनाअनुसार अघि बढनाको परिणामका रुपमा व्याख्या गरे । “यदि हामीले कुनै काममा मेहनत गरेका छौं र त्यो योजनामा विश्वास गर्न सक्यौं भने सफलता पक्कै हात लाग्छ,” उनले जोडे ।
कीर्तिपुरको मैदान बलिङमैत्रि भनिँदै आए पनि जारी प्रतियोगितामा ब्याट्सम्यानहरुले खुलेर खेल्दा ठूला योगफलहरु बनिरहेका छन् । प्रतियोगिता बनेको रनबारे अख्तर भन्छन् “अहिलेसम्मका खेलमा राम्रो ब्याटिङ भइरहेको छ । ब्याट्सम्यानहरु पनि खुसी छन् ।”
सामान्य क्रिकेट प्रतियोगिताबाट सुुरु भएको ईपीएल अन्तर्राष्ट्रिय मापदण्डअनुसार भइरहेको अख्तरको दाबी छ । ईपीएल तेस्रो संस्करणसम्म आइपुुग्दा विश्व क्रिकेटमा आफुूलाई चिनाएका अनुहार कीर्तिपुरमा मैदान उत्रिन थालिसकेका छन् ।
विभिन्न देशका प्रभावकारी खेलाडी मैदान उतारेको ईपीएलमा अर्को चर्चाको विषय हो उनीहरुको पारिश्रमिक । तर, आयोजक अख्तर विदेशी खेलाडी ‘स्पोटर्स होलिडे’का रुपमा नेपाल आएको बताउँछन् ।
“सबैजना खेलाडीहरु नेपाल आएका छन् । उनीहरु क्रिकेट ‘होलिडे’ मा आएका छन् । उनीहरुको फ्लाइट पनि त्यसैगरि व्यवस्थापन गरिएको छ । नेपाल रहँदाको यहाँको खर्च टिम मालिकहरुले बेहोर्ने गरेर आएका छन्,” विदेशीले नेपालमा आएर काम गर्दा श्रम स्वीकृति लिनै पर्ने बाध्यकारी व्यवस्था प्रतियोगितामा पालना नगरिएको अवस्थामा अख्तरले भने ।
विदेशी खेलाडीहरु पैसाका लागि भन्दा पनि यहाँको क्रिकेटका लागि आउने गरेको अख्तरको भनाई छ । “विदेशी खेलाडीहरु नेपाली क्रिकेटका लागि आएका हुन् । पैसाको लागि नेपाल कोही पनि आउँदैन्,” उनले भने ।
ईपीएलका ६ वटै सहरका टिमहरुले नेपाली खेलाडीलाई अक्सनमार्फत् टिममा आवद्ध गरेको थियो । विदेशी खेलाडीहरुलाई चाहिँ प्रदर्शनको आधारमा नेपाल बोलाइएको तर्क गर्दै अख्तरले विदेशी खेलाडीका लागि नेपालमा अक्सन गरेर टिममा राख्ने समय आइनसकेको बताएका छन् ।
“विस्तारै हामीकहाँ पनि विदेशी खेलाडीको अक्सन हुन्छ, होला । तर, तत्काललाई त्यो योजना छैन । ईपीएललाई अझै माथि उठ्न दिनुुस् । त्यसपछि हुन सक्छ,” नेपालमा क्रिकेटको नियामक निकाय क्यान अस्तित्वमा आएपछि विदेशी खेलाडीको पनि अक्सन सम्भव भएको बताउँदै अख्तरले थने “हामीले ठूूला खेलाडी ल्याउन थालेका छौं । भोलिका दिनमा क्रिकेट बोर्ड आउँछ । यस्तो काम गर्दा बोर्डको पनि भूूमिका रहन्छ । त्यसपछि मात्रै हामी विदेशी खेलाडीको अक्सन बारे सोच्न सक्छौं । तर, अहिलेको अवस्थामा विदेशी खेलाडीको अक्सन सम्भव नै थिएन ।”
प्रत्येक टिमले तीन जना विदेशी खेलाडी राख्नुपर्ने अनिवार्य नियमसँगै विश्व क्रिकेटका हस्ती मुलुुक इंग्ल्यान्ड, दक्षिण अफ्रिका, भारत, स्कटल्यान्ड र आयरल्यान्डका खेलाडीलाई मैदान उतार्न आफैँ पनि सक्रिय भएर लागेको अख्तरले बताएका छन् ।
“म आफै पनि खेलाडी हुँ । ६ वर्षसम्म इंग्ल्यान्डमा खेल्दा धेरै खेलाडीसँग मेरो व्यक्तिगत सम्बन्ध बनेको थियो । पाउल स्टर्लिङ, केभिन ओब्रायन वा रिचार्ड लेवीसँग मेरो व्यक्तिगत सम्बन्ध राम्रो थियो । त्यसले पनि खेलाडी ल्याउन सहज भयो,” अख्तरले सुनाए “उनीहरुलाई आफ्नो योजना सुनाएँ । ईपीएलको बारेमा । नेपाली क्रिकेटको बारेमा । सबै खेलाडीलाई सम्झाएँ । त्यसपछि टिम मालिकलाई भनेँ । यी–यी खेलाडी नेपाल आउन इच्छुुक छन्, तपाईंहरु ल्याउने भए ल्याउन सक्नुहुन्छ भने ।”