उर्लाबारी । नेपाली कांग्रेसका केन्द्रीय सदस्य गगन थापाले वर्तमान सरकारले देशलाई समृद्धितर्फ डोर्याउन नसक्ने बताएका छन् ।
नेपाली कांग्रेस उर्लाबारी नगर समितिले मंगलबार दुर्गापुरीमा आयोजना गरेको आमसभालाई सम्बोधन गर्दै सरकारको नेतृत्व गरिरहेको नेकपा भित्रको संकट र प्रधानमन्त्री केपी ओलीको असक्षमता कारण देश समृद्धितर्फ जानै नसक्ने बताएका हुन् ।
सरकार बनाउने लोभमा एमाले र माओवादीबीच एकिकरण भएको आरोप लगाउँदै पूर्व स्थास्थ्य मन्त्री समेत रहेका थापाले दुई पार्टीका नेताबीचको झगडा भित्रभित्रै तीब्र रुपमा बढ्दै गइरहेको दाबी गरे । बर्तमान प्रधानमन्त्री ओली इतिहासकै बलियो सरकारको प्रधानमन्त्री भएपनि अहँमका कारण बरालिएको आरोप नेता थापाको छ ।
सरकारको बारेमा आलोचना गर्नुभन्दा पनि अबको चार वर्ष पार्टी संगठन सुदृढिकरण गरी आगामी निर्वाचनमा विजय हाँसिल गर्नेगरी कांग्रेस अघि बढ्नुपर्नेमा उनले जोड दिए ।
आमसभामा कांग्रेस मोरङ क्षेत्र नं. १ का सभापति खड्ग फागोले कम्युनिष्ट पार्टी सर्वहारा वर्गको नभएको बताए । “अहिलेको कम्युनिष्ट पार्टी सर्वहारा वर्गको होईन । कम्युनिष्ट पार्टी साँच्चै कम्युनिष्ट बन्यो भने म पनि कम्युनिष्ट पार्टीमा अहिले नै प्रबेश गर्न तयार छु ।” फागोले भने ।