जाजरकोट । १६ दिने अन्तर्राष्ट्रिय लैंगिक हिंसा विरुद्धको अभियान समापनका अवसरमा जाजरकोट सदरमुकाम खलंगाका महिलाले हिंसा विरोधी नारा र प्लेकार्डसहित बजार परिक्रमा गरेका छन् । बजार परिक्रमापछि आयोजित कार्यक्रममा प्रदेशकी सांसद कृष्णा शाहले निर्मला पन्तका ‘बलात्कारी’ भनेर पक्राउ गरिएका प्रदीप रावललगायत अभियुक्त सक्कली अपराधी नभएको दाबी गरिन् ।
नेकपाकी स्थानीय नेत्रृ तथा सांसद शाहले सरकारले जसरी पनि निर्मलाका हत्यारालाई पत्ता लगाइछोड्ने कुरामा आफू विश्वस्त भएपनि विभिन्न व्यक्तिहरुलाइ समातेर सरकारले गलत गरेको आरोप लगाइन् । हत्यारा पत्ता लाग्न समय लागे पनि एक दिन वास्तविकता जनतामाझ अवश्य आउने सांसद शाहको भनाइ थियो ।
भेरी नगरपालिका–१ रावतगाउँकी हजारी नेपालीले महिलाहरुले राज्यबाट सामाजिक सुरक्षाको पूर्ण महसुस गर्न नपाएसम्म यस्ता अभियानको कुनै अर्थ नरहने बताइन् । “दिनदिनै नाबालिकादेखि वृद्ध आमाहरु बलात्कारका शिकार हुँदै गर्दा राज्यले न सुरक्षाको प्रबन्ध गर्न सकेको छ न त अपराधीलाई कानुनको कठघरामा उभ्याउन सकेको छ । कहाँ छ कानुनी राज्य ?” उनले प्रश्न गरिन् ।
अन्तक्र्रिया कार्यक्रमका सहभागीहरुले निर्मला पन्तको परिवारलाई राज्यले तत्काल न्याय दिलाउनुपर्ने धारणा राखेका थिए । सहभागीहरुले सांसद शाहसँग पनि यसबारे प्रश्न गरेका थिए ।