काठमाडौं । साउन १० गते साथीको घरमा गएकी कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको पाँचमहिना पूरा हुन लाग्दासमेत अनुसन्धानले सही बाटो लिन सकेको छैन । साथीको घरमा गएकी निर्मला साउन ११ गते घर नजिकै उखुबारीमा मृतअवस्थामा फेला परेकी थिइन् ।
उनको बलात्कारपछि हत्या भएको प्रहरीको प्रारम्भिक अनुसन्धान र पोस्टमार्टम रिपोर्टले पत्ता लगाएको भए पनि अहिलेसम्म अनुसन्धान हत्याराको नजिक पुग्न सकेको छैन ।
अहिले प्रहरीको नियन्त्रणमा रहेका प्रदीप रावल र विशाल चौधरीले हत्या स्वीकार गरेको भए पनि डीएनए परीक्षण जारी रहेकाले त्यसको रिपोर्ट सार्वजनिक नभएसम्म प्रहरीले यसबारेमा केही बताउन चाहेको छैन ।
यसअघि प्रहरीले हिरासतमा लिएर डीएनए नमिलेर छाडिदिएका दिलिपसिंह बिष्टले समेत हत्या स्वीकार गरेको जनाएको थियो । प्रहरीले अहिलेसम्म दुईसय बढीसँग बयान लिएको भए पनि हत्याराको नजिक पुग्न सकेको छैन । त्यसैले यो घटना थप रहस्यमयी बन्दै गएको छ ।
प्रहरीले भने अहिले पनि अनुसन्धान जारी रहेको जनाएको छ । प्रहरी प्रमुख सर्वेन्द्र खनालले संसदीय समितिमा सोमबार घटनाको न्यारोडाउन भएको बताएका थिए ।
राष्ट्रिय सभाको दिगो विकास तथा सुशासन समितिको बैठकमा प्रहरी महानिरीक्षक खनालले भनेका थिए, “अनुसन्धान अहिले पनि जारी छ । अनुसन्धानमा विश्वस्त रहन सबैलाई आग्रह गर्छु । हामीले कोही पनि नक्कली मान्छेलाई ल्याएर अनुसन्धान गर्दैैनौं । यसमा विश्वास गरौं । सबैभन्दा ठूलो विश्वास नै हो । कसैले भन्नुभयो प्रहरीले कुखरा चोर समात्यो । कुकुरा चोरले गरेन भनेर कोही भन्न सक्नुहुन्छ ? कुखुरा चोर नराम्रै मान्छे हो पनि भन्न सक्नुहुन्न । कुखुरा चोर राम्रो हो भनेर कसरी भन्न सक्ने ? एकपटक कुखुरा चोरेको मान्छेले सधैँ कुखुरा नै चोर्यो भनेर भन्नु पनि सान्दर्भिक हुँदैन ।”
यसबारेमा प्रहरी प्रमुख खनालले हत्याका बारेमा बाहिर आएका सबै अड्कल गलत भएको टिप्पणी गरे ।
“मान्छेका विभिन्न अड्कलमात्रै छन् । बरु त्यसमा त्यो छैन भने को छ त भन्न सक्नुपर्यो । होइन भने हामीले गरेका अनुसन्धान निस्वार्थ रुपमा हो भन्ने बुझिदिनुपर्यो । मैले निर्मला हत्याको अनुसन्धानका लागि कुनै दबाब दिएको छैन । यदि यस्तो कार्यमा मेरो भूमिका कहीँ कतै देख्नुभयो भने संसदमा ल्याएर बर्दी खोलिदिए हुन्छ ।”