काठमाडौं । स्टार लेगस्पिनर सन्दीप लामिछानेको अनुपस्थिति बिर्सँदै ललितपुर प्याट्रियोट्सले लगातार दोस्रो जित हासिल गरेको दिन एभरेष्ट प्रिमियर लिग (ईपीएल) मा सुखद सुरुआत गर्नेमा काठमाडौं किंग्सले पनि नाम लेखाएको छ ।
चितवन टाइगर्स र पोखरा राइनोजका लागि भने सोमबारको दिन पनि ईपीएलमा सुखद रहेन । चितवनले काठमाडौंलाई ६ विकेटको नतिजा सुम्पिँदा ललितपुरले पोखरामाथि ८ विकेटको शानदार जित हासिल गर्यो । अघिल्लो दिन सन्दीप लामिछानेले तीन विकेट लिँदा ललितपुरले चितवनमाथि ११ रनको जित हासिल गरेको थियो ।
प्रतियोगितामा ललितपुरलाई सुखद सुरुआत दिलाएलगत्तै बिग बास लिग खेल्न सन्दीप आइतबारै बेलुकी अस्ट्रेलिया प्रस्थान गरेका थिए । आइतबारै अर्को खेलमा पोखराले २ सय १५ रनको विशाल योगफल बनाउनाका बावजुद भैरहवा ग्लाडिएटर्ससँग तीन विकेटको नतिजामा पराजित भएको थियो ।
लगातारको जितपछि पछिल्ला दुई खेलमा नतिजा निकालेको ललितपुर चार अंकसहित शीर्ष स्थानमा रहेको छ भने काठमाडौं, भैरहवा र विराटनगर समान एक—एक खेलमा जित निकाल्दै समान २—२ अंक बनाएका छन् ।
गौरव तोमर र जयकिसन कोल्सावालाले १ सय २९ रनको कीर्तिमानी ओपनिङ साझेदारी गरेपछि काठमाडौंले सोमबार पोखरा राइनोजमाथि ८ विकेटको शानदार जित हात पारेको हो । म्यान अफ दी म्याच तोमरले पाउल कौलिनको बलमा भेट्रान शक्ति गौचनबाट क्याच हुनअघि ४१ बलमा ८ छक्का र ४ चौकासहित ८२ रन बनाए भने । कोल्सावाला पहिलो विकेटका रुपमा पवेलियन फर्किनुअघि ३८ बलमा ५१ रन बनाए । ३ छक्का र ४ चौका प्रहार गरेका कोल्सावालालाई सुसान भारीले भेट्रान शक्ति गौचनबाट क्याच गराएका थिए । ललितपुरका लागि सन्नी पटेलले थप २० तथा सोनु तामाङले ११ रन बनाउँदा टोली २५ बलअघि नै १ सय ६७ रनको लक्ष्यमा पुगेको थियो ।
त्यसअघि टस जितेर ब्याटिङ रोजेको पोखराले रिचार्ड लेवीको ८४ तथा विनोद भण्डारीको अविजित ३४ रनमा निर्धारित २० ओभर खेल्दै ४ विकेटको क्षतिमा १ सय ६६ रनको योगफल बनाएको थियो । पवन सर्राफको बलमा सन्दीप जोराको हातबाट क्याच हुनुुअघि लेवीले ३९ बलमा ९ छक्का र ३ चौका प्रहार गरेका थिए । विनोदले २३ बलमा १ छक्का र ३ चौका प्रहार गरे भने टोलीका लागि ओपनर काइल कोइटजरले १९, पाउल कोलिङले १४ तथा सुनील धमलाले १० रनको योगदान गरे । ललितपुरका लागि पवनले ४ ओभरमा ३१ रन खर्चेर ३ विकेट लिएँ ।
सोमबारै पहिलो खेलमा भारतीय खेलाडी आनन्द सुुब्रमन्यमले अविजित ४३ तथा सागर पुनले ३९ रनको योगदान गरेपछि काठमाडौंले चितवनबाट पाएको १ सय ६१ रनको लक्ष्य निर्धारित २० ओभरको सात बलअघि १ सय ६४ रन बनाएर पूरा गर्यो । अत्यन्तै आक्रामक ब्याटिङ गर्दै काठमाडौंलाई लक्ष्यमा पुर्याउने क्रममा म्यान अफ दी म्याच आनन्दले १८ बलमा ४ छक्का र १ चौका प्रहार गरे । यसैगरी पाउल स्टर्लिङबाट एलबिडब्लु धरापमा पर्नुअघि ३४ बलमा ६ चौका प्रहार गरेका थिए ।
साहब आलमको बलमा जोन सिम्पसनबाट स्टम्पिङ भएका केभिन ओ ब्रायनले अपेक्षा गरेभन्दा निक्कै कम ९ रनमात्र बनाउन सके । काठमाडौंका लागि नरेश बुढाऐरले २२, अमरसिंह राउटेलाले अविजित २१ तथा अमित श्रेष्ठले १८ रन जोडेका थिए । चितवनका लागि साहब आलमले दुई तथा ललितसिंह भण्डारी र स्टर्लिङले एक/एक विकेट लिएका थिए ।
यसअघि टस हारेर ब्याटिङलाई निम्त्याइएको चितवनले १९.५ ओभरमा सबै विकेट गुमाउँदा १ सय ६० रनको योगफल बनाएको थियो । चितवनका लागि दीपेन्द्रसिंह ऐरीले ४० बलमा ५ चौकासहित ४५ रन बनाउँदा ओपनर स्टर्लिङले १३ बलमा ३ छक्का र ३ चौकासहित आक्रामक रुपमा ३९ रन बनाएका थिए । यसैगरी सन्दीप सुनारले २५, कप्तान पृथु बास्कोटाले अविजित २० तथा जर्ज स्कटले १५ रन बनाए । चितवनका अन्य ब्याट्सम्यानले दोहोरो अंकमा स्कोर गर्न सकेनन् ।
काठमाडौंका प्रदीप साहु र सम्साद शेखले ३/३ तथा सागर पुन, केभिन ओब्रायन र अमरसिंह राउटेलाले १–१ विकेट लिए ।