काठमाडौं । माघको तेस्रो साता काठमाडौंमा हुने वीर गणेशमान सिंह राष्ट्रिय बक्सिङ  च्याम्पियनसिपका लागि प्रदेश नम्बर १ को छनोट प्रतियोगिता यही शुक्रबार हुने भएको छ । प्रदेश छनोटका लागि केन्द्रिय आयोजकले पाँच सदस्यीय आयोजक समिति गठन गरेको छ । 
वीर गणेशमान सिंह राष्ट्रिय बक्सिङ च्याम्पियन आयोजक कमिटीले १ नम्बर प्रदेशको प्रतियोगिता गर्न बनाएको समितिमा श्याम पौडेल,  अभिषेक श्रेष्ठ, विकासकुमार गुमाजु,  रामबाबु पासवान र सञ्जीव घोष छन् । 
माघ तेस्रो साता काठमाडौंमा हुने राष्ट्रिय प्रतियोगिताका लागि सबै प्रदेशमा छनोट प्रतियोगिता हुनेछ । त्यसअनुसार प्रदेश नम्बर १ को छनोट प्रतियोगिता शुक्रबार  विराटनगरस्थित सहिद रंगशालामा हुने बताइएको छ । मोरङ जिल्ला  बक्सिङ संघको प्राविधिक सहयोग रहने प्रतियोगितामा प्रदेश भरीका गरी ४० देखि ५० खेलाडीको सहभागितारहने आयोजकले जनाएको छ ।