काठमाडौं । ओपनिङ ब्याट्सम्यान गौरव तोमर र जयकिसन कोल्सावालाको उत्कृष्ट साझेदारी पारीको सहयोगमा ललितपुर प्याट्रियट्सले पोखरा राइनोजमाथि ८ विकेटको जित हात पारेको छ । लगातार दोस्रो जित निकालेको ललितपुरका लागि ओपनिङ ब्याट्सम्यान गौरव र कोल्सावालाले १२९ रन लामो साझेदारी पारी खेलेका थिए ।
पोखराले दिएको १६७ रनको लक्ष्य पछ्याएको ललितपुरले १५.४ ओभरमा १७२ रन बनाउँदै लक्ष्य पुरा गरेको हो । ललितपुरका सन्नी पटेलले अन्तिम बलमा छक्का प्रहार गर्दै व्यक्तिगत २० रन बनाउँदै टिमलाई जित दिलाए ।
लक्ष्य पूरा गर्ने क्रममा तोमरले सर्वाधिक ८२ रन बनाए । उनले ८ छक्का र ४ चौका प्रहार गरे भने अर्का ब्याट्सम्यान जयकिसन कोल्सावालाले ३ छक्का र ४ चौकाको सहयोगमा ५१ रन बनाए ।
सन्नी पटेल र सोनुु तामाङले अविजित क्रमशः २० र ११ रन बनाए । ललितपुरविरुद्ध बलिङ गरेको पोखराका बलरले १२ ओभरसम्म पनि ओपनिङ ब्याट्सम्यान तोमर र कोल्सावालाको साझेदारी तोड्न निकै ढिला गरे ।
सुसान भरी र पाउल कौलिनले पोखराका लागि समान एक—एक विकेट लिए । यसअघि टस जितेर पहिले ब्याटिङको निर्णय गरेको पोखरा राइनोजका लागि रिचार्ड लेभिले ८४ रनको उत्कृष्ट पारी खेलेका थिए । उनले लगातार दुुई खेलमा राम्रो ब्याटिङ गरेपनि पोखराले उनको ब्याटिङको सदुुपयोग गर्दै जित निकाल्न सकेको छैन ।
रिचार्ड लेभिले ८४ रन बनाउँदा विनोद भण्डारीले ३४ रन बनाएका थिए । त्यस्तै, कप्तान काइल कोइट्जरले १९ रन मात्रै बनाउँदा ब्याट्सम्यान पाउल कौलिनले १४ रन र सुनिल धमलाले १० रनमात्रै बनाएका थिए ।
पोखराविरुद्धकाृे पहिलो इनिङमा ललितपुरका पवन शराफले उत्कृष्ट बलिङ गरे । उनी एक्लैले पोखराका महत्वपूर्ण तीन विकेट लिएका थिए ।
पोखराका रिचार्ड लेभि, सुनिल धमला र कप्तान  काइल कोइट्जरको महत्वपूर्ण विकेट पवनले एक्लैले लिए । उनले ४ ओभर बलिङ गर्दै ३१ रन खर्चेर ३ विकेट लिएका हुन् ।