काठमाडौं । सेयर बजारले सुधारिने क्रमलाई निरनतरता दिएको छ । गत बिहीबारदेखि बढ्न थालेको सेयर बजारमा सोमबार पनि दोहोरो अंकको वृद्धि देखिएको हो ।
सेयर बजारका लगानीकर्ताले अनलाइन कारोबारका लागि धमाधम युजरनेम र पासवर्ड पाउँदा तथा लाभांशको घोषणा भइरहँदा सेयर बजारमा सकारात्मक प्रभाव परेको हो । नेप्सेले आइतबार अनलाइन कारोबारका लागि युजरनेम र पासवर्ड वितरण गर्न ब्रोकरहरुलाई निर्देशन दिएका हो भने नेपाल इन्भेस्टमेन्ट बैंकले १८ प्रतिशत बोनस सेयरसहित ४० प्रतिशत लाभांश वितरण गर्ने जनाएको हो ।
लामो समयदेखि घटिरहेको सेयर बजारमा लगानीकर्ताको सम्पत्तिमा भारी गिरावट आइसकेको छ । जसको विरोधमा लगानीकर्ता विभिन्न चरणमा आन्दोलनमा उत्रिसकेका छन् । केह लगानीकर्ता भने अहिले पनि रिले अनसनमा बसिरहेका छन् । सेयर बजार उकास्न सरकारबाट निरन्तर असहयोग भइरहेको लगानीकर्ताको आरोपसँगै बजार परिसूचर ११ सय ३० को बिन्दुभन्दा पनि तल ओर्लेर सुधारको क्रममा लागेको हो ।
सोमबार पनि कारोबार सुरु भएको सवा घन्टा बढेको सेयर बजार केही समय स्थिर रही कही घटेर अन्तमा बढेको हो । अन्ततः बजार १२ दशमलव ४९ अंकले बढेर ११ सय ४४ दशमलव १९ अंकमा पुगेको हो ।
नेप्से बढ्दा सेन्सिटिभ इन्डेक्स २ दशमलव ८ अंकले बढेर २ सय ४३ दशमलव ८१ अंकमा पुगेको छ भने कारोबार रकममा पनि करिब दोब्बर वृद्धि भएको छ । नेप्से बढ्दा आइतबार सेयर बजारको कारोबार रकम २२ करोड ३७ लाख रुपैयाँ हुँदा सोमबार ४३ करोड ६७ लाख रुपैयाँको सेयर किनबेच भए । यसक्रममा नेप्सेमा १ सय ६३ कम्पनीका १२ लाख ६४ हजार कित्ता सेयर खरीदबिक्री भए ।
यसदिन कारोबारमा आएका दशमध्ये ८ समूहमा सुधार आए । उत्पादनमूलक र अन्य समूह घट्दा यसदिन जीवन बीमा समूह सर्वाधिक ९८ दशमलव ६९ अंकले बढ्यो । त्यसैगरी निर्जीवन बीमा समूहमा ७२ दशमलव शून्य ५ अंकको सुधार आयो ।
यसदिन सर्वाधिक कारोबार हुने कम्पनीको सूचीमा नेपाल इन्भेस्टमेन्ट बैंक शीर्षस्थानमा रह्यो । बैंकको ८४ हजार ५ सय ९५ कित्ता सेयर ५ करोड ४८ लाख रुपैयाँमा किनबेच भए । बैंकले ४० प्रतिशत बोनस दिने घोषणा गरेपनि सेयर कारोबारमा उत्साह दखिएको हो । यसदिन बैंकको सेयरमूल्यमा कुनै सुधार आएन । बैंकको सेयरको मूल्य प्रतिसेयर ६ सय १९ रुपैयाँ रहेको छ ।
सोमबार रैराङ हाइड्रोका सेयरधनीले सर्वाधिक ७ दशमलव ७७ प्रतिशत सेयरमूलय गुमाए भने महिला सहायता लघुवित्तको सेयरमूल्यमा ६ दशमलव ६ प्रतिशत गिरवाट आयो ।