काठमाडौं । आइतबारदेखि आन्दोलनरत लगानीकर्ताको माग संख्या बढेर १३ पुगेको छ । पुँजी बजार सुधार र विस्तारका लागि भन्दै आइतबारदेखि सुरु भएको पुँजी बजार लगानीकर्ताको रिले अनसनमा तीन माग थपिएको हो ।
अनसनरत लगानीकर्ताले अर्थमन्त्री डा. युवराज खतिवडाको राजीनामा माग गरेका छन् । उनीहरुले पुँजीबजारमैत्री अर्थमन्त्रीको माग गरेका हुन् ।
अनसनरत लगानीकर्ताको मागमा सरकारले पुँजी बजारसम्बन्धी आफ्नो धारणा तथा नीति स्पष्ट गरी बजार सुधार तथा बिस्तारका लागि तत्काल विशेष कार्यक्रम ल्याउनुपर्ने, धितोपत्र बोर्डले तीन वर्ष अघिदेखि गैरआवासीय नेपाली र विदेशमा बस्ने नेपालीलाई पुँजी बजारमा ल्याउन कार्यविधि बन्दै गरेको भन्दै आएकोमा तत्काल सो कार्यविधि लागू गरी उनीहरुलाई पुँजी बजारमा भित्र्याउनुपर्ने, बैंक खाता र डिम्याट खाता इन्टिग्रेटेड अनलाइन कारोबार प्रणालीको पहुँच तत्काल आम लगानीकर्तासम्म पुर्याउनुपर्ने आदि रहेका छन् ।
त्यसैगरी सेयर दलालमार्फत मार्जिन ट्रेडिङ तत्काल खुला गर्नुपर्ने, सेयर धितो कर्जाको सिमा धितो मूल्यांकनको ८० प्रतिशत पुर्याउनुपर्ने र जोखिम भारित अंश सय प्रतिशत वा सोभन्दा कम कायम गरी सस्तो ब्याजमा कर्जा प्राप्त हुने व्यवस्था गर्नुपर्ने माग राखेका छन् ।
उनीहरुले प्राथमिक पुँजीको २५ प्रतिशतसम्म होइन, कुल कर्जा लगानीको २५ प्रतिशत रकम बैंक तथा वित्तीय संस्थाले सेयर धितो कर्जा प्रवाह गर्नसक्ने व्यवस्था गर्नुपर्ने बताएका छन् ।
थप गरिएको मागमा नेप्सेको पुर्नसंरचना, बीमा कम्पनीको लाइसेन्स घोटाला छानबिन र पुँजीगत लाभकर फिर्ता गर्नुपर्ने रहेका छन् ।
अनसनरत लगानीकर्ताले माग पुरा नभएसम्म रिले अनसन जारी राख्ने बताएका छन् । अनसन समूहको नेतृत्व लगानीकर्ता हरी ढकालले गरेका छन् ।
यस्ता छन् माग