काठमाडौं । प्रतिनिधिसभा अन्तर्गतको संसदीय सुनुवाइ समितिले सरकारद्वारा भारत, मलेसिया, युनाईटेड अरब इमिरेट्स (युएई) र इजरायलको लागि राजदूतमा प्रस्ताव गरेका क्रमसः नीलाम्बर आचार्य, उदयराज पाण्डे, कृष्ण ढकाल र अन्जान शाक्यको नाम अनुमोदन गरेको छ । आइतबार सिंहदरबारमा बसेको समितिको बैठकले प्रस्तावित चार राजदूतको नाम अनुमोदन गर्ने निर्णय गरेको हो ।
“प्रस्तावित चार जना राजदूतको सुनवाई भयो । सर्वसम्मतीले चारै जनाको नाम स्वीकृत (अनुमोदन) गर्ने निर्णय भयो,” संसदीय सुनवाई समितिका सभापति लक्ष्मणलाल कर्णले बैठकको निर्णय सुनाउँदै भने ।
बैठकले दुईवटा निर्णय गरेको कर्णले बताए । पहिलो, चारै जना प्रस्तावित राजदूतको नाम अनुमोदन गर्ने निर्णय र दोस्रो, अब राजदूत सिफारिस गर्दा समावेशी सिद्धान्तलाई पालन गर्दै सोही अनुरुप नाम पठाउन सम्बन्धित निकायलाई निर्देशन दिने निर्णय भएको उनले जनाए ।
“सुनवाइको लागि अहिले पठाएको नाम सूची संविधानमा व्यवस्था भएअनुसार समावेशी सिद्धान्तसँग मेल खाँदैन । त्यसैले अब राजदूत सिफारिस गर्दा समावेशी सिद्धान्तको पालना गर्न सम्बन्धित निकायलाई निर्देशन दिने निर्णय समेत भएको छ,” सभापति कर्णले भने ।
सरकारले केही दिन अघि भारतको लागि निलाम्बर आचार्य, मलेसियाको लागि उदयराज पाण्डे, युएईको लागि कृण्ण ढकाल र इजरायलको लागि अन्जान शाक्यको नाम राजदूतमा सिफारिस गरेको थियो । सरकारको सिफारिसको आधारमा समितिले चारै जनाको सुनवाई आइतबार गरेको थियो । आइतबारको बैठकमा सबैभन्दा पहिला आचार्य, त्यसपछि पाण्डे, ढकाल र शाक्यको सुनवाइ गरिएको थियो । सुनवाइपछि सर्वसम्मतले उनीहरुको नाम स्वीकृत गरिएको हो ।
आईतबार स्वीकृत भएका आचार्य पूर्वमन्त्री हुन् । उनी नेपाल–भारत प्रबुद्ध व्यक्ति समूह (इपिजी) का सदस्य पनि थिए । पाण्डे यसअघि पनि राजदूत भइसकेका व्यक्ति हुन् । उनी सन् २०११ देखि २०१५ सम्म साउदी अरबका लागि राजदूत भई कार्य गरेका थिए । यस्ता अर्का स्वीकृत नाम ढकाल भने परराष्ट्र मन्त्रालयका सहसचिव हुन् । शाक्य भने एक समय परराष्ट्र मामिला अध्ययन प्रतिष्ठानमा कार्यरत थिईन् ।
स्वीकृत नाम अब समितिले परराष्ट्र मन्त्रालयमा पठाउनेछ । परराष्ट्रले उनीहरुको नाममा एग्रिमो तयार पारी सम्बन्धीत देशमा पठाउने छ र सम्बन्धीत देशले ती नाम स्वीकृत गरी पठाएपछि राष्ट्रपति विद्यादेवी भण्डारीले उनीहरुलाई राजदूतमा नियुक्त गर्नेछिन् ।
