तेलगंना । भारतको कान्छो राज्य तेलंगनामा गत शुक्रबार विधानसभा निर्वाचन सम्पन्न भएको छ । तर, त्यहाँको चुनावमा राजनीतिक दल र मतदाताको कुरामात्रै होइन लाटोकोसेरोको प्रसंगपनि चर्चामा आयो । प्रहरी अधिकारीहरुका अनुसार चुनावको बेलामा भारतको यो राज्यमा लाटोकोसेरोको एउटा प्रजातिको धेरै नै माग भएको थियो । कारण अरु केही नभएर लाटोकोसेरोको शरीरको अंग आफ्नो विपक्षी दलका उम्मेदवारलाई दुर्भाग्यपूर्ण हुने र आफूले चुनाव जितिने विश्वासका कारण पनि त्यसको तस्करी गरिएको बताइएको छ । यस्तो कार्यमा संलग्नलाई प्रहरीले पक्राउ समेत गरेको छ ।
कर्नाटकको कलबुर्गी जिल्लाको सेडमका प्रहरीले बीबीसीलाई बताए अनुसार चुनावको बेलामा बेच्नका लागि ६ जना मानिस हरेकले १२ वटा लाटोकोसेरो तयार पारेर राखेका थिए । उनीहरुलाई सेडमबाट प्रहरीले पक्राउ गरेको थियो । यो क्षेत्र तेलंगनाको सीमावर्ती क्षेत्र हो । तेलंगनामा शुक्रबार ११९ सदस्यीय विधानसभाको लागि निर्वाचन भएको हो । कलबुर्गीका वन विभागका सहायक वन संरक्षक रामकृष्ण यादवले भने,‘‘तेलंगनाको एक व्यक्तिले उनीसँग फोनमा सम्पर्क गरेको थियो । उसले फोनमा विरोधी उम्मेदवारका विरुद्ध काला जादू गर्नका लागि लाटकोसेरो चाहिएको जनाएको थियो ।’’
एक प्रहरी अधिकारीले भने,‘‘उनले कसलाई संकेत गरेका हुन् भन्ने कुरा थाहा भएन । नेताले नै यो गर्न लागेका हुन् वा कोही कार्यकर्ताले यसो गर्न लागेको हो ।’’ उनका अनुसार विरोधी खेमामा डर फैलाउनका लागि पनि लाटोकोसेरोको प्रयोग गर्ने गरिएको हो । कसैले आफ्नो विरुद्धमा काला जादू प्रयोग गरेको थाहा पाएपछि विपक्षी उम्मेदवारको हौसला तोडिने भएकोले पनि यस्ता भ्रम फैलाउने गरिएको छ । भारतमा लाटोकोसेराका तीस प्रजाती पाइन्छन् । ती मध्ये इगल आउल र बार्न आउलको माग धेरै हुने गरेको छ । ती प्रजातिलाई काला जादूको लागि प्रयोग गरिने तर्क स्थानीयको छ ।
(बीबीसीको रिपोर्टमा आधारित)