काठमाडौं । सहिद स्मारक ‘ए’ डिभिजन लिग फुुटबलमा बलियो टिमका रुपमा हेरिएको विभागीय टिम नेपाल आर्मी क्लबले बिहीबार फ्रेन्ड्सविरुद्धको खेलमा अंक बाँडेपनि ट्रफी दाबेदारीको सम्भावना कायमै रहेको प्रशिक्षक नविन न्यौपानेले बताएका छन् । सातदोबाटोस्थित अखिल नेपाल फुुटबल संघ (एन्फा) मैदानमा भएको खेलमा आर्मी र फ्रेन्ड्स क्लबले गोलरहित बराबरी खेलेका थिए ।
“आजको खेलमा बराबरी खेलेपनि बाँकी रहेका बलियो टिमसँगको खेलमा उनीहरुमाथि जित हात पार्न सके ट्रफी दाबेदारीको सम्भावना कायमै छ,” प्रशिक्षक न्यौपानेले भने । फरवार्डले गोल निकाल्न नसक्दा अंक बाँड्नुपरेको उनले बताए । “कप्तान भरत खवास र नवयुुग श्रेष्ठ नहुँदा समस्या देखियो । टिममा भएका फरवार्डहरुले गोल गर्न नसक्दा टिमले अंक बाँड्नुुपर्यो,” उनले भने ।
लिगका दुुई खेलमात्रै खेलेका नवयुुग अझै चोटमुक्त भइनसकेको प्रशिक्षक न्यौपानेले बताए । चोटका कारण खेलबाहिर रहेका नवयुुग फ्रेन्ड्सविरुद्धको खेलमा खेलको ८५ औं मिनेटमा मैदान प्रवेश गरेका थिए ।
विभागीय टिम नेपाल आर्मी क्लबसँग अंक खोसेको फ्रेन्ड्स क्लबका प्रशिक्षक रमेश महर्जनले जितका लागि मैदान प्रवेश गरेपनि अंक खोस्न सफल भएकोमा खुसी व्यक्त गरे । “आर्मी जस्तो बलियो टिमसँग एक अंक खोस्न सक्नुपनि खुसीको कुरा हो । आजको खेलमा भाग्यले पनि साथ दियो,” उनले भने ।
आर्मीसँग बराबरी खेलेको फ्रेन्ड्स क्लब ५ अंक सहित १० औं स्थानमा रहेको छ भने चार खेलमा जित निकालेर दुुई खेलमा बराबरी खेलेको आर्मी लिग अंक तालिकामा १४ अंक सहित चौथो स्थानमा यथावत् रहेको छ ।