नयाँ दिल्ली । भारतको राजधानी दिल्लीस्थित एउटा रेड लाइट क्षेत्रबाट उद्धार गरेर त्यहाँको सरकारी आश्रयगृहमा राखिएका ८ जना नेपाली महिला हराएका छन् । दिल्लीको दिलशाद गार्डनस्थित संस्कार आश्रयगृहमा राखिएका उनीहरू त्यहीँबाट हराएको बताइएको बीबीसीले जनाएको छ ।
ती महिलाहरूलाई दिल्लीको जीबी रोड क्षेत्रबाट उद्धार गरेर उक्त सरकारी आश्रयगृहमा राखिएको थियो । गत शनिबार र आइतबार राति ती ८ नेपाली र एक भारतीय सहित ९ जना महिला आश्रयगृहबाट एकाएक हराएका थिए ।
उनीहरू आफैँ त्यहाबाट निस्केर गएका हुन् वा कसैले लिएर गएको भन्ने नखुलेको बताइएको छ । सरकारी आश्रयगृहबाटै महिलाहरू हराएको विषयमा दिल्लीस्थित महिला आयोग र नेपाली दूतावास नयाँ दिल्लीले चासो राखेको जनाइएको छ ।
आम आद्मी पार्टीको सरकार रहेको दिल्लीमा विपक्षी भारतीय जनता पार्टीले भने दिल्ली सरकारको विरोध गर्दै आश्रयगृह अगाडि प्रदर्शन समेत गरेको थियो । प्रहरीले घटनाको छानबिन गरिरहेको बताइएको छ । हराउनेको नाम र उनीहरुको नेपालको ठेगाना भने खोलिएको छैन ।
तस्बिरः महिला हराएको आश्रम–बीबीसी