काठमाडौं । नेपाल कम्युनिस्ट पार्टी (नेकपा) स्थायी कमिटी सदस्य घनश्याम भुसालले पार्टीका नेताहरूमा सांस्कृतिक अधपतन शुरू भएको टिप्पणी गरेका छन् ।

एसिया प्यासिफिक समिटमा सरकार शुरूमा सहआयोजक र व्यापक विरोधपछि सहयोगी बनेकामा आपत्ति प्रकट गर्दै उनले प्रधानमन्त्रीलगायत नेकपाका नेताहरूमा सांस्कृति विचलन र अधपतन शुरू भएको कटाक्ष गरेका हुन् ।

विगत केहि दिनमा नेताहरुको सांस्कृतिक अधपतन र नग्नताको जुन राष्ट्रीय परेड प्रदर्शन भयो त्यसको मूल्य यस मुलुकका सन्तान-दरसन्तानले लामो समयसम्म तिर्नु पर्नेछ l

— Ghanashyam Bhusal (@gsbhusal) December 2, 2018

शुक्रबारदेखि काठमाडौँमा शुरू भएको सम्मेलनलाई उनले नग्नताको राष्ट्रिय परेडका रूपमा समेत व्याख्या गरेका हुन् ।

माइक्रो ब्लगिङ साइट ट्विटरमा उनले लेखेका छन्– “ विगत केही दिनमा नेताहरूको सांस्कृतिक अधपतन र नग्नताको जुन राष्ट्रिय परेड प्रदर्शन भयो त्यसको मूल्य यस मुलुकका सन्तान–दरसन्तानले लामो समयसम्म तिर्नु पर्नेछ ।

त्यस्तै सोही सम्मेलनमा सरकारको सहभागिताप्रति अर्का स्थायी कमिटी सदस्य भीम रावलले समेत आपत्ति जनाएका छन् । उनले कुनै व्यक्ति र निजी संस्थाको निहीत स्वार्थमा सरकार र पार्टी दुरुपयोग भएको बताउँदै उनले विरोध जनाएका हुन् ।

कुनै व्यक्ति र निजी संस्थाको निहित स्वार्थमा सरकार र पार्टीको दुरुपयोग गर्न मिल्दैन । राष्ट्रीय हित र कुटनीतिक मर्यादा र परिणामको हेक्का राख्नु परयो । शान्तिको नाममा सम्मेलन गर्नेहरूले यत्रो पैसा कति कहाँबाट आयो जनतालाई भन्नु पर्छ । नभने सरकारले खोजेर भन्नु पर्छ ।

— Bhim Rawal (@BhimRawal179) November 30, 2018

रावलले शनिबार ट्विटरमा ट्विट गरेका थिए– “कुनै व्यक्ति र निजी संस्थाको निहित स्वार्थमा सरकार र पार्टीको दुरुपयोग गर्न मिल्दैन । राष्ट्रीय हित र कुटनीतिक मर्यादा र परिणामको हेक्का राख्नु पर्‍यो । शान्तिको नाममा सम्मेलन गर्नेहरूले यत्रो पैसा कति, कहाँबाट आयो जनतालाई भन्नुपर्छ । नभने सरकारले खोजेर भन्नुपर्छ ।”