काठमाडौं । त्रिभुवन आर्मी क्लबलाई टाइब्रेकरमा ४–२ ले पराजित गर्दैं एपिएफले लगातार चौथो पटक प्रधान सेनापति अन्तर्राष्ट्रिय आमन्त्रण महिला फुटबल प्रतियोगिताको उपाधि जितेको छ । निर्धारित र थपिएको अतिरिक्त समयमा १–१ को बराबरी भएपछि खेलको निर्णय टाइब्रेकरबाट भएको हो । जसमा आर्मीकी कप्तान कृष्णा खत्री र इन्दिरा राई गोल गर्न चुक्दा एपिएफ लगातार चौथो पटक प्रधान सेनापति कपको उपाधि जित्न सफल भयो ।
कप्तान खत्रीको प्रहार एपिएफकी गोलरक्षक एन्जीला तुम्बापोले रोकिएकी थिइन् भने इन्दीरा राईको प्रहार बाहिरिएको थियो । निशा बोहरा र गोलरक्षक अन्जना राना मगरको प्रहार गोलमा परिणत भएको थियो । एपिएफकी सावित्रा भण्डारी, रेनुका नगरकोटी, अनिता बस्नेत र कप्तान अनु लामाले गोल गरेकी थिइन् भने गिता रानामगरको प्रहार बाहिरिएको थियो । भद्रकालिस्थित सेनाको मैदानमा यसअघि खेलको ४१ औ मिनेटमा अनिता बस्नेतको गोलबाट एपिएफले अग्रता लिएको थियो ।
रेनुका नगरकोटीको पासमा अनिताले गरेको प्रहार आर्मीकी गोलरक्षक अन्जना रानामगरको हातबाट फुत्किँदै गोलमा परिणत भएको थियो । दोस्रो हाफमा फरक रणनीतिसहित मैदान प्रवेश गरेको आर्मीले ६१ औं मिनेटमा बराबरी गोल फर्काएको थियो । एपिएफकी गोलरक्षक अन्जिला तुम्बापोको गल्तीमा विमला चौधरीले गोल गरेकी थिइन् । त्यसपछि दुवै टोलीबाट गोल हुन सकेन । निर्धारित र थपिएको २० मिनेटमा समेत गोल नहुँदा खेल टाइब्रेकरमा गएको थियो । जसमा एपिएफ बाजी मार्न सफल भयो । जीतसँगै एपिएफले ३ लाख रुपैयाँसहित ट्रफी पुरस्कार पाएको छ । उपविजेता बनेको आयोजक नेपाली सेनाको त्रिभुवन आर्मीले १ लाख ५० हजार रुपैयाँमा चित्त बुझाएको छ । सेमिफाइनल पुगेका नेपाल पुलिस क्लब र प्रदेश नम्बर दुईले ५०–५० हजार पुरस्कार पाएका छन् ।
प्रतियोगितामा उत्कृष्ट गोलरक्षक एपिएफकी एन्जिला तुम्बापो, उत्कृष्ट फर्वाड एपिएफकी सावित्रा भण्डारी र उत्कृष्ट प्रशिक्षक एपिएफका जनक सिंह थारु भए । आर्मीकी सुनिता चौधरी उत्कृष्ट डिफेन्डर हुँदा विमला चौधरी उत्कृष्ट मिडफिल्डर घोषित भइन् । सर्वोत्कृष्ट खेलाडी भएकी आर्मीकी पुनम मगरले स्कुटर पुरस्कार पाइन् । प्रतियोगिताका विजेतालाई प्रधानसेनापति पुर्णचन्द्र थापाले पुरस्कार वितरण गरे ।
मंसिर ५ गतेबाट सुरु भएको प्रतियोगितामा ३ विभागिय क्लब, ७ प्रदेशका टोली र दुई भारतीय गरी १२ टोली सहभागि भएका थिए ।