तराई र पहाडबीच अन्योन्याश्रित सम्बन्ध रहेको पुष्टि गर्दै बर्दियाको राजापुर नगरपालिकाका प्रतिनिधि साझा हितका विषयमा छलफल गर्न कालीकोट पुग्नु नेपालको भौगोलिक यथार्थ आत्मसात गर्नु हो । राजापुर र मान्मलाई कर्णाली नदीले जोडेको छ । कर्णालीको शिरतिर पहिरो गयो भने राजापुरमा बाढी पस्छ । राजापुरमा बाढी आउँदा वा खडेरी पर्दा मान्ममा अनिकाल लाग्छ । अर्थात्, राजापुर कालीकोटको सुखदुःख एक अर्कामा निर्भर छ । यो यथार्थ राजापुर नगरपालिकाका प्रतिनिधिले बुझेको देखियो । उनीहरूले कालीकोट पुगेर नरहरिनाथ गाउँपालिका जनप्रतिनिधिसँग मूलतः पानीका कारण उत्पन्न भएका समस्यामा छलफल गरेकाछन् । राजापुरका बासिन्दाका लागि कर्णालीमा आउने बाढी सबैभन्दा चुनौतीपूर्ण समस्या हो । कर्णाली जलाधार क्षेत्रका अरू बासिन्दाको सहयोगबाट मात्र राजापुरको दुःख अन्त्य हुन्छ भन्ने वास्तविकता त्यहाँका जनप्रतिनिधिले बुझेको देखियो ।
नेपाललाई भूगोलले नै भिन्न भएर पनि अन्योन्याश्रित बनाएको छ । हिमाल, पहाड र तराई कुनै क्षेत्र पनि एक्लै अडिन र अगाडि बढ्न सक्तैन । सबै ठूला नदी हिमाली भेगबाट सुरु भएर पहाड हुँदै तराई पुग्छन् । यिनै नदीले तीनै भौगोलिक क्षेत्रलाई जोडेका छन् । नदीहरूसमेतको कारणले भौगोलिक विविधतामा अनुपम भएर पनि सबै भूभाग एउटै शृंखलाका कडीका रूपमा रहेका हुन् । नेपाली भूगोलको यो विशेषता संसारका अरू मुलुकमा बिरलै भेटिएला । यसले नेपाली जनजीवनलाई पनि एक अर्कासँग जोडेको छ र प्रकृतिमा बढी नै निर्भर बनाएको छ । नेपालका नीति निर्माताले भने नेपालको जनजीवन र भूगोलबीचको जेलिएको सम्बन्धको यथार्थ बुझेको देखिएको थिएन । तर, कर्णाली जलाधार क्षेत्रका बासिन्दाले तराई र पहाडी जनजीवनको यो अन्योन्याश्रित सम्बन्ध बुझेको देखियो ।
राजापुरे अग्रसरताले तराईका अरू क्षेत्रका प्रतिनिधिहरूको पनि आँखा खुलेको हुनुपर्छ । विशेषगरी चुरे विनाशका कारण प्रतिवर्ष बाढी र खडेरीको मारमा पर्न पुगेका २ नम्बर प्रदेशका जनप्रतिनिधिहरूले राजापुरेको अग्रसरतालाई गम्भीरतापूर्वक लिनुपर्ने देखिन्छ । उनीहरू अहिले पहाड वा हिमालमा पुग्नु पर्दैन । चुरेभावर क्षेत्रका जनतासँग साझा भविष्यका बारेमा छलफल गर्नुपर्छ । चुरे दोहनमा राजनीतिक दलका नेताको संलग्नता र संरक्षण छ । जनप्रतिनिधिहरू जनताप्रति इमानदार हुने हो भने त्यस्तो दोहनको चक्र र गिरोहविरुद्ध साझा संघर्ष गर्न हिचकिचाउनु हुँदैन । यो बुद्धिमत्तापूर्ण अग्रसरतालाई प्रादेशिक र संघीय सरकारले हौसला दिनुपर्छ । नेपालको विकास र समृद्धि भूगोल र जनजीवनको अन्योन्याश्रित सम्बन्धसँग जोडिएको यथार्थ आत्मसात् गरी संघीय सरकारले प्रदेशहरूबीचको सहकार्य विशेषगरी प्रदेश नम्बर २ लाई प्रदेश नम्बर १ र ३ का पहाडी जिल्लासँग सहकार्य गर्न प्रेरित गर्नुपर्छ । प्रदेश नम्बर २ को सरकारले तराईको जीवनस्तर उकास्न वातावरणीय क्षति कम गर्ने, गरिबी कम गर्ने र समानता बढाउने न्यायपूर्ण कार्यक्रममा बढी ध्यान दिनुपर्छ । सराहनीय अग्रसरताका लागि राजापुरेहरू बधाईका पात्र छन् ।