अमेरिकी नाइटक्लबको शौचालयमा गणेश, सरस्वती, काली र शिव ! 

अमेरिकी नाइटक्लबको शौचालयमा गणेश, सरस्वती, काली र शिव ! 

न्यूयोर्क । अमेरिकाको न्यूयोर्कस्थित ‘हाउस अफ एस’ नामक नाइटक्लबमा हिन्दू देवीदेवताका चित्रहरू राखिएको विषय विवादमा आएको छ । सो विषय सामाजिक सञ्जालमा सार्वजनिक भएपछि बहस प्रारम्भ भएको हो । सो सम्बन्धी विवरण अमेरिकाको ओहायो राज्यमा बस्ने भारतीय मूलकी  अमेरिकी महिला अंकिता मिश्राले सार्वजनिक गरेकी हुन् । उनले त्यस विषयमा आपत्ति समेत जनाएकी थिइन् । त्यसपछि यो विषय चर्चामा आएको हो । 

मिश्राले आफ्नो इन्स्टाग्राम  र ब्लगमा यो  विषयबारे लेखेकी थिइन् । उनले शौचालयको तस्बिर र भिडियो पनि प्रेषित गरेकी छन् । मिश्राका अनुसार उनी गत महिना सो नाइटक्लबमा गएकी थिइन् । आफ्ना साथीहरूसँग त्यहाँ गएकी उनले त्यही बेला भीआईपी बाथरुम प्रयोग  गर्ने क्रममा सो दृश्य देखेकी हुन् । 

पहिला शौचालयको भित्ताका भएका चित्रमा आफ्नो ध्यान नपुगेको भए पनि ट्वाइलेट पेपर निकाल्न लाग्दा महादेवको चित्र देखेको उनले बताएकी छन् । त्यसपछि चारैतिर हेर्दा अन्य देवीदेवताका तस्बिर  देखेर आफू छक्क परेको उनले लेखेकी छन्। शौचालयमा गणेश, सरस्वती, काली र शिवका तस्बिरहरू राखिएका थिए ।

उनले ब्लगमा लेखेकी छन, ‘‘एक तरिकाले म मन्दिरमा थिएँ, तर सबै कुरा उल्टो थियो । मैले जुत्ता लगाएकी थिएँ र म थुकिरहेकी थिएँ ।” आफूले यस्तो परिस्थिति पहिला पनि भोगेको भन्दै उनले यस विषयलाई ‘उपनिवेशवाद’ सँग जोड्ने प्रयास गरेकी छन् । उनले लेखेकी छन् , “म रुबिन म्यूजियम अफ आर्ट विषयको शिक्षिका थिएँ जहाँ मेरो सांस्कृतिक पृष्ठभूमिका कारण ममाथि व्यङ्ग्य गरिन्थ्यो । तर यो घटना मैले बेवास्ता गर्न सकिनँ ।”

उनले सामाजिक सञ्जालमा पनि यसबारे लेखिन् र अन्तमा नाइटक्लबलाई इमेल लेखेर यसमा आफ्नो असन्तुष्टि व्यक्त गरिन् । गत महिना पठाइएको इमेलमा उनले “सार्वजनिक स्थानमा शान्ति कायम रहोस् भनेर आफू मौन रहने गरेको भए पनि फेसबुक र इन्स्टाग्राममा यसबारे आफ्नो अनुभव लेखेपछि म तपाईँहरूसँग सीधै कुरा गर्न चाहन्छु,” लेखेकी थिइन्। मिश्राले गुनासो गरेपछि सो क्लबले क्षमायाचना गरेको थियो ।

(बीबीसी र इन्डिया टुडेको सहयोगमा)
 

प्रतिकृया दिनुहोस