काठमाडौं । विभागीय टिम त्रिभुवन आर्मी क्लबले समूह चरणको आफ्नो दोस्रो खेलमा च्यासल युथ क्लबविरुद्ध संघर्षपूर्ण जित निकालेको छ । शनिबार सशस्त्र प्रहरी बलको हल्चोक मैदानमा भएको खेलमा आर्मीले च्यासललाई १–० गोल अन्तरले पराजित गर्यो ।
राष्ट्रिय फुटबल टोलीका स्ट्राइकर भरत खवासको कप्तानीमा रहेको टोलीले च्यासलविरुद्ध गरेको २९ औं मिनेटको गोल निर्णायक बन्यो ।
२९ औं मिनेटमा आर्मीले पाएको कर्नर प्रहार गरेका सन्तोष तामाङको बललाई आर्मीका विकास खवासले नियन्त्रणमा लिँदै हेडिङमार्फत गोल गरेका थिए । उनले गरेको उक्त हेड गोल आर्मीको जितका लागि निर्णायक बन्यो । पहिलो हाफमा एक गोल खाएको च्यासलले दोस्रो हाफमा खेल आफ्नो पक्षमा पार्ने प्रयास गरेपनि गोल फर्काउन भने सकेन ।
नेपाली राष्ट्रिय फुटबल टोलीका स्टाइकर विमल घर्ती मगरसहितको च्यासलले आफ्नो उपस्थिति बलियो देखाउन नसकेपनि आर्मी विरुद्धको खेलमा थप गोल गर्न भने दिएन । च्यासलले यसअघिको आफ्नो पहिलो खेलमा मच्छिन्द्र क्लबसँग अंक बाँडेको थियो ।
नवलपरासिमा बिहीबार सम्पन्न राइनो कपको विजेता च्यासलले लिगको लागि तयारी गर्न नपाएपनि राइनोको विजेताका हिसाबले उच्च मनोबलका साथ मैदान उत्रिँदै आर्मीलाई चुुनौती दिने बताइएको थियो ।
आर्मी क्लबले यसअघिको पहिलो खेलमा न्युरोड टिम (एन्आरटी) सँग २–२ बराबरी खेल्दै अंक बाँडेको थियो भने च्यासलले पनि यसअघिको पहिलो खेलमा मच्छिन्द्र क्लबसँग गोलरहित बराबरी खेल्दै १–१ अंक बाँडेको थियो ।