काठमाडौं । पाँच वर्षपछि भएको सहिद स्मारक ‘ए’ डिभिजन लिग चाडबाड विश्रामपछि शनिबारबाट पुनः सुचारु हुँदैछ । असोज १३ मा सुरु गरिए पनि बंगलादेशमा भएको बंगबन्धु गोल्डकप तथा दशैँ र तिहारका कारण स्थगित लिग शनिबार सुचारु हुँदा साबिक विजेता मनाङ मर्स्याङदी क्लब र न्युरोड टिम (एनआरटी) बीच खेल हुनेछ । शनिबारै सशस्त्र प्रहरी बलको हल्चोकस्थित मैदानमा हुने अर्को खेलमा नेपाली सेनाको त्रिभुवन आर्मी क्लबले नवप्रवेशी च्यासल युथ क्लबसँग प्रतिस्पर्धा गर्नेछ ।
लामो समयको विश्रामपछि सुरु हुन लागेको लिगका लागि क्लबहरुले खास तयारी गर्न पाएका छैनन् । दशैँ, तिहार र छठजस्ता ठूला चाडका कारण क्लबहरुको तयारी प्रभावित भयो । तथापि मैदानमा सबै टोलीको उदेश्य बढि भन्दा बढि अंक हासिल गर्नु हुनेछ । उपाधि रक्षाको अभियानमा रहँदा मनाङले स्वभाविक रुपमा जितको लक्ष्य बनाउँदा शनिबार एनआरटी भने बराबरीका साथ कम्तिमा एक अंक खोस्ने अभियानमा हुनेछ ।
“युुवा खेलाडीको टिम भएकाले हामी केही कमजोर छौं । टिममा एक/दुई जना सिनियरबाहेक सबै युुवा खेलाडी छन् । मनाङ मस्र्याङ्दी राम्रो टिम हो । तर, हामी उनीहरुलाई रोक्ने गरी खेल्नेछौं । लिगको पहिलो खेलमा हामीले आर्मीलाई कडा टक्कर दिएका थियौं । तर रेफ्रीको गलत निर्णयका कारण हामी बराबरीमा सीमित भयौं । मनाङसँग हामी त्योभन्दा उच्च स्तरको फुटबल खेल्नेछौं ।”
अत्यन्तै विवादास्पद बनेको जारी लिगको पहिलो खेलमा आर्मी र एनआरटीले २—२ को बराबरी खेलेका थिए । पहिलो खेलमा ब्रिगेड ब्वाइज क्लब (बिबिसी)माथि ३–१ को रवाफ जमाएको मनाङले शनिबार विजययात्रालाई निरन्तरता दिने लक्ष्य लिएर मैदान उत्रिने योजना बनाएको छ ।
“एनआरटी राम्रो टिम हो । एनआरटीलाई कमजोर आँक्ने गल्ती हामी गर्ने छैनौं । तर, त्यसको मतलब, हामी डराएका भने छैनौं । जित हाम्रो एकमात्र लक्ष्य हो,” मनाङका अफ्रिकी प्रशिक्षक तोपे फुजाले भने ।
च्यासल र आर्मीका लागि लिगको पहिलो खेल मिश्रित सफलताका थिए । एनआरटीसँग हारको निक्कै नजिक पुगिसकेको आर्मी रेफ्रीको विवादास्पद निर्णयबाट प्राप्त गोलमा अन्तिम समयमा बराबरी गर्दै अंक बाड्न सफल भएको थियो । यसैगरी च्यासलले मछिन्द्र क्लबसँग गोलरहित बराबरीमा चित्त बुझाएको थियो । दोस्रो खेलमा शनिबार आमने–सामने हुँदा भने दुवै टोली जितको खोजीमा हुने छन् ।
च्यासल नवलपरासीमा बिहीबार सम्पन्न राइनो कपको उपाधि जितेको थियो । जसका कारण मनोबल उच्च भए पनि लिगकै लागि भनेर तयारी गर्न नपाएको प्रशिक्षक राजुकाजी शाक्यले बताए । कावासोतीबाट राइनो कप खेलेर आज शुक्रबारमात्र काठमाडौं आइपुगेको बताउँदै प्रशिक्षक शाक्यले थपे, “लिगकै लागि भनेर राम्रो तयारी गर्न त पाएका छैनौं । तर, पनि भोलीको खेलमा केटाहरुले राम्रो खेल्ने छन् ।”
आर्मीका प्रशिक्षक नवीन न्यौपानेले राइनो कपको च्याम्पियन भए पनि च्यासललाई हराउन आफूहरु सक्षम रहेको प्रतिक्रिया दिए । “अघिल्लो खेलमा भएका कमजोरीलाई सुधार्दै अगाडि बढ्छौं । हामी नियमित प्रशिक्षण हुने भएकाले तुलनात्मक रुपमा राम्रो टिम हौं । तर लिगमा सहभागि सबै टिम उत्तिकै राम्रा छन् । हामी च्यासलसँग जितको योजनासहित राम्रो खेल्नेछौंं ।”