काठमाडौं । त्रिभुवन आर्मी क्लबकी रशिला महर्जन योनेक्स सनराईज आठौं पुष्पलाल स्मृति राष्ट्रिय खुला ब्याडमिन्टन प्रतियोगिता अन्तर्गत महिला एकल, युगल र यु—१७ महिला तीनै विधातर्फ उपाधिनजिक पुगेकी छन् । महिला एकलतर्फ भएको सेमिफाइनलमा एपिएफकी जेशिका गुरुङ्गलाई २१–१३, २१–११ को सेटमा हराउँदै रशिलाले उपाधिका लागि आर्मीकै नङ्गशल देवी तामाङसँगको भेट पक्का गरेकी छन् । नङशल देबीले एपिएफकी शोभा गौचनलाई २१–१२, २१–८ को सेटमा पराजित गरिन् ।
यस्तै,यु—१७ महिलातर्फ रशिलाले मोरङकी रोज पाण्डेलाई २१–९, २१¬–६ को सोझो सेटमा पराजित गरिन् । फाइनलमा अब रशिलाले आर्मीकै रञ्जना भट्टसँग प्रतिस्पर्धा गर्नुपर्नेछ । रञ्जनाले मोरङ्गकै सिमा राजवंशीलाई २१–१६, २१–१५ ले पन्छाउँदै फाइनल स्थान बनाएकी हुन् । युगलतर्फ रशिला र नङ्गशल जोडीले बाँकेकी सीता राई र सम्झना शर्माको जोडीमाथि २१–११, २१–११ को सोझो सेटमा जित निकालेकी छन् । अब रशिला र नङ्गशलले फाईनलमा एपिएफका पुजा श्रेष्ठ र जेशिका गुरुङ्गको सामना गर्ने भएका छन् ।
पुजा र जेशिकाको जोडीले आर्मीका अमिता गिरी र अनुमाया राईको जोडीलाई २१–१४, १७–२१,२१–१३ ले पराजित गरेकी थिइन् । यु—१७ पुरुषतर्फ प्रिन्स दाहाल प्रियान्सु सिंह क्षेत्रीलाई २१–१२, २१–९ ले हराउँदै फाइनल पुगेका छन् । उनले अब फाइनलमा आर्मीका दिवस शंकरसँग प्रतिस्पर्धा गर्नेछन् । शंकरले जेष्टकै पेम्बा शेर्पालाई २१–१४, १५–२१ ,२१–१२ ले पराजित गरे । पुरुष एकलतर्फ आर्मीका रत्नजित तामाङ्ग रुकेश महर्जनलाई २१–११, २१–१४ को जित निकाले ।
अब रत्नको भेट एपीएफका दिपेश धामीसँग हुनेछ । दिपेशले आर्मीका नविन श्रेष्ठलाई २१–१७, २१–६ ले पाखा लगाए । पुरुष युगलतर्फ सेनाका रत्नजित तामाङ्ग र नविन श्रेष्ठको जोडीले फाइनलमा एपीएफका दिपेश धामी र विजित थापा मगरको जोडीसँगको भेट पक्का गर्यो । तामाङ्ग र नविनको जोडीले आर्मीकै रुकेश महर्जन र प्रफुल महर्जनलाई २१–१५, २१–१९ ले तथा धामी र मगरको जोडीले एपिएफकै गौतम कठायत र सुनिल जोशीको जोडीलाई २१–१७, १९–२१ र २१–१८ ले पाखा लगाउँदै फाइनल प्रवेश गरेका छन् ।
मास्टर्स ४५ वर्षमाथिको खेलमा आर्मीका सुभाष श्रेष्ठ र भूमि गुरुङ्गको जोडीले फाइनल यात्रा तय गरेको छ । श्रेष्ठ र गुरुङ्गको जोडीले जेष्ट ब्याडमिन्टनका अनुज पौडेल र प्रेम घलेको जोडीलाई २१–१५, २१–१७ ले पराजित गरे । यस्तै अर्को खेलम जेष्ट ब्याडमिन्टनका श्याम पराजुली र नविन बाबु श्रेष्ठको जोडीले ललितपुरका सुनिल मान शाक्य र पूर्ण भक्त चित्रकारको जोडीलाई २१–११, २१–११ ले पन्छाउँदै फाइलनमा स्थान बनाएको छ ।