काठमाडौं । प्रधानमन्त्री केपी शर्मा ओली अब पूर्णरुपमा स्वस्थ भएको उनको उपचारमा संलग्न चिकित्सक प्रा. डा. अरुण सायमीले बताएका छन् ।
ओलीलाई कात्तिक १२ गते बिहान साढे ४ बजे शिक्षण अस्पतालको मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा भर्ना गरिएकोमा ५ दिनपछि ‘डिस्चार्ज’ गरिएको थियो । डिस्चार्जको एक हप्तापछि फलोअप चेकअप गर्नुपर्ने चिकित्सकहरुले जनाएका थिए । त्यो पनि भइसकेको डा. सायमीले बताए ।
प्रधानमन्त्रीलाई डिस्चार्जपछि उपचारमा संलग्न चिकित्सकहरुले बालुवाटारमै गएर ‘चेकअप’ गरेका थिए । डा.सायमीले भने, ‘‘हामीले बालुवाटारमै गएर हेर्यौं । अब धेरै सुधार भएको छ ।’’
प्रधानमन्त्रीले विगतमा फलोअप चेकअप बैंककमा गराउने गरेपनि अहिले जान आवश्यक नभएको डा. सायमीको भनाइ थियो । उनले भने, ‘‘उहाँले अहिले बालुवाटारबाटै काम गरिरहनु भएको छ । कार्यालयमा जाँदा पनि अब फरक पर्दैन । धेरै सम्पर्कमा आउँदा त जसलाई पनि ‘इन्फेक्सन’ हुन सक्छ । तर प्रधानमन्त्रीलाई अब ठीक भएको छ,’’ डा. सायमीले भने ।
प्रधानमन्त्री ओलीलाई छातीमा संक्रमण तथा शरीरमा चिनीको मात्रा असन्तुलित देखिएपछि यसअघि अस्पताल भर्ना गर्नुपरेको थियो ।
प्रधानमन्त्रीको निजी चिकित्सकको रुपमा कार्यरत डा. दिव्या सिंह शाहले पनि शुक्रबार बिहान बाह्रखरीसँगको कुराकानीमा प्रधानमन्त्रीको स्वास्थ्यमा सुधार आएको र अब कार्यालयमै गएर काम गर्दा पनि हुने अवस्था भएको बताइन् । उनले फलोअप जाँचका लागि अब विदेश जानुपर्ने अवस्था पनि नभएको बताइन् ।
प्रधानमन्त्री ओलीलाई यसअघि प्रा.डा.सायमीको संयोजकत्वमा प्रा.डा.दिव्या सिंह र डा.सन्तकुमार दास सम्मिलित समूहले उपचार गरेको थियो । छातीको संक्रमण, ज्वरो र खोकी नियन्त्रणमा नआएपछि प्रधानमन्त्रीलाई त्यतिबेला अस्पताल भर्ना गरिएको थियो ।
प्रधानमन्त्री ओलीको ११ वर्ष अगाडि २०६४ साल असारमा भारतको अपोलो अस्पतालमा मिर्गौला प्रत्यारोपण गरिएको थियो । मिर्गौला प्रत्यारोपणपछि उनले नियमित औषधि खाँदै आएका छन् । गतवर्ष पुस अन्तिम साता थाइल्यान्डको बैंककस्थित बुम्रुङग्र्याड अन्तर्राष्ट्रिय अस्पतालमा उनको फलोअप चेकअप भएकोमा त्यसपछि नेपालमै स्वास्थ्य परीक्षण हुँदै आएको छ ।
प्रधानमन्त्रीले बालुवाटारमै विभिन्न कुटनीतिक तथा अन्य व्यक्तिहरुलाई भेट्दै आएका छन् । बिहीबार साँझ पनि उनले नेपाल भ्रमणमा रहेका संयुक्त राष्ट्रसंघका उपमहासचिव अमिना जे मोहम्मदलाई बालुवाटारमा भेट दिएका थिए । प्रधानमन्त्रीको निजी सचिवालयका अनुसार प्रधानमन्त्री ओलीले सो अवसरमा शान्ति अभियानमा नेपालले सन् १९५८ देखि नै योगदान गरिरहेको स्मरण गराएका थिए । संयुक्त राष्ट्रसंघका उपमहासचिव मोहम्मद शिक्षासम्बन्धी अन्तर्राष्ट्रिय अभियानमा भाग लिन बुधबार नेपाल आएकी हुन् ।
(तस्बिरः संयुक्त राष्ट्र संघका उपमहासचिव अमिना जे मोहम्मद बिहीबार साँझ बालुवाटारमा प्रधानमन्त्री ओलीसँग भेट्दै ।)