एजेन्सी । टिन जेडभाजले इन्जुरी समयमा गरेको गोलमा क्रोएसियाले बिहीबार राति यूईएफए नेसन्स लिगमा स्पेनमाथि ३–२ को रोमाञ्चक विजय हासिल गरेको छ ।
विश्वकप उपविजेता क्रोएसियालाई जिताउन जेडभाजले दुई तथा एन्ड्रिज क्रामारिचले एक गोल गरे । स्पेनका ड्यानियल सेवालस र सर्जियो रामोसले गोल गरेका थिए । घरेलु मैदान माकसिमिरमा क्रोएसियाले क्रामारिचको गोलबाट ५४औं मिनेटमा अग्रता लिएको थियो । क्रामारिकले इभान पेरिसिचको पासमा गोल गरेका थिए । त्यसको दुई मिनेट वित्न नपाउदै ड्यानियल सेवालेसले इस्कोको पासमा बराबरी गोल फर्काए ।
६९औं मिनेटमा जेडभाजले कप्तान लुका मोड्रिचको पासमा पूनः क्रोएसियालाई अग्रता दिए । ७८औं मिनेटमा स्पेनले पेनाल्टी अवसर पायो । जसमा कप्तान सर्जियो रामोसले कुनै गल्ति गरेनन् । अन्तिम समयमा जेडभाजले गोल गर्दै क्रोएसियालाई ३–२ को रोमाञ्चक जित दिलाए ।
जितपछि क्रोएसियाका प्रशिक्षक ज्लाट्को डालिचले भने, “उत्कृष्ट खेलको पुरस्कार पायौं ।”
जितपछि प्रतियोगिताको लिग ‘ए’ समुह ४ मा रहेको क्रोएसियाले दोस्रो चरण पुग्ने सम्भावना कायम राखेको छ । तीन खेलबाट क्रोएसियाको ४ अंक छ भने समान खेलबाट इङ्ल्यान्डको पनि ४ अंक छ । एक खेल बढी खेलेको स्पेनसँग ६ अंक छ ।
“विश्वकै बलिया टोली सम्मिलित यो धेरै कठिन समूह हो । हाम्रो सम्भावना अझै कायम छ,” स्पेनका प्रशिक्षक लुइस इनरिकेले भने, “हामीले सुधार गर्नु पर्ने धेरै कुरा छन् । आजको खेलबाट खुशी पनि छु । तर नतिजा हाम्रो पक्षमा रहेन । आज फुटबल निस्पक्ष हुन सकेन ।”