एजेन्सी । देशका लागि सबैभन्दा धेरै गोल वायर्न रुनीले आफ्नो कीर्तिमान इङ्ल्यान्डका कप्तान ह्यारी केनले तोड्न सक्ने बताएका छन् ।
१ सय २० औं अन्तर्राष्ट्रिय खेलका लागि रुनी राष्ट्रिय टोलीमा फर्किएको खेलमा इङ्ल्यान्डले मंगलबार वेम्बली रंगशालामा अमेरिकामाथि ३–० को विजय हासिल गर्यो । मेजर सकर लिगको क्लब डिसी युनाइटेडबाट खेल्ने ३३ वर्षे रुनीले इङ्ल्यान्डबाट ५३ गोल गरिसकेका छन् । जुन रुनीभन्दा ८ वर्ष कान्छा केनको भन्दा ३४ गोल धेरै हो ।
म्यानचेस्टर युनाइटेड र एभर्टनका पूर्व फरवार्ड रुनीले १७ वर्षको उमेरमा अस्ट्रेलियाविरुद्ध २००३ मा इङ्ल्यान्डबाट डेब्यू गरेका थिए । उनले २०१७ मा अन्तर्राष्ट्रिय फुटबलबाट सन्यास लिएका थिए । उनको कीर्तिमानी अन्तर्राष्ट्रिय करियरको सम्मानको लागि इङ्ल्यान्ड फुटबल संघले बिहीबार रुनीलाई अवसर दिएको थियो । केन र फुटबल संघका प्रमुख ग्रेग क्लार्कले रुनीलाई सम्मान गरेका थिए ।
“मलाई केनको हातबाट अवार्ड लिन मन छ । किनकी मलाई विश्वास छ मेरो कीर्तिमान उनले तोड्न सक्छन्,” रुनीले भने, “समर्थकको अगाडी पून एक पटक आउन पाउँदा खुशी लागेको छ । म र मेरो परिवारको लागि विशेष क्षण हो ।”
५८औं मिनेटमा जेसे लिङ्गार्डको स्थानमा मैदान प्रवेश गरेका रुनीले गोलका केही अवसर पाए पनि त्यसलाई सदुपयोग गर्न सकेनन् । रुनीलाई टोलीमा मौका दिदाँ कीर्तिमानी खेल खेलेका अन्य केही खेलाडीहरुले आलोचना गरेका थिए । पिटर शिल्टोनले उपहारका रुपमा दिन नहुने बताउँदै आएका थिए ।
लिङ्गार्डले गरेको गोलमा इङ्ल्यान्डले २५औं मिनेटमा अग्रता लिएको थियो । त्यसको दुई मिनेट वित्न नपाउँदै ट्रेन्ट एलेक्जेन्डर आर्नोल्डले अग्रता दोब्बर बानाए । ७७औं मिनेटमा इङ्ल्यान्डबाट डेब्यू गरेका कालुम विल्सनले अर्को गोल थपेका थिए ।
“रुनीसँग खेल्ने मेरो सपना पूरा भएको छ । उनी रोल मोडल हुन् । डे«सिङ रुममा म नर्भस भएको थिए । उनी नजिक मलाई आत्मविश्वास हुनु, गुमाउनु पर्ने केही छैन भनेर हौसला बढाए,” बोरुसियाका डर्टमन्डका १९ वर्षे विंगर जाडोन सान्चोले भने, “रुनीलाई धन्यवाद भन्न चाहन्छु । उनले सुझाव नदिएको भए म खेल भरी नर्भन नै रहन्थे ।”