काठमाडौं । एकमहिना भन्दा बढीको विश्रामपछि सहिद स्मारक ‘ए’ डिभिजन लिग शनिबारबाट शुरु हुँदैछ । सबै टोलीले एक खेल खेलिसकेको अवस्थामा त्रिभुवन आर्मी क्लब इतिहास रच्ने लक्ष्यमा छ भने अन्य क्लब विरासत जोगाउने योजना बनाउँदैछन् ।

साविक विजेता मनाङ मर्स्याङ्दी, संकटा, थ्री स्टार र नेपाल पुलिस क्लबले विजयी शुरुआत गरे भने सशत्र प्रहरी बल (एपीएफ), त्रिभुवन आर्मी क्लब, च्यासल युथ, मच्छिन्द्र, न्युरोड टिम (एनआरटी) र हिमालयन शेर्पाले अंक बाडे । लामो समयपछि सुरु भएको सहिद स्मारक लिगको पहिलो खेलमा परम्परागत रुपमा बलियो भनिएका टोलीहरुलाई जित्नका लागि संघर्ष गर्नुपर्‍यो । उपाधिको दाबेदार मानिएको त्रिभुवन आर्मी क्लबले इन्जुरी समयमा बराबरी गर्दै एनआटीसँग अंक खोस्न सफल भयो । तथापी त्रिभुवन आर्मीका प्रशिक्षक नविन न्यौपाने क्लबलाई लिग उपाधि जिताउने लक्ष्यमा छन् । 

“पहिलो खेल सबैका लागि कठिन हुन्छ । हाम्रो लागि पनि त्यस्तै भयो । टोलीले आफ्नो क्षमताको २५ प्रतिशतमात्र खेल्न सक्यो । तथापी खेलाडीहरुले अन्तिमसम्म डटेर खेले । जसका कारण अंक लिन सफल भयौं । आगामी दिनमा गल्ती सच्याएर आगाडि बढ्नेछौं,” त्रिभुवन आर्मी क्लबका प्रशिक्षक न्यौपानले भने, “भर्खर एक खेल सकिएको छ । थ्री स्टार, मनाङ, पुलिस बलिया टोली हुन् । तर यसपालि सबै टोली उत्तिकै राम्रा देखिएका छन् । च्यासल, संकटा, एनआरटीहरुले पनि राम्रो खेले । अहिल्यै केही भन्न सकिने अवस्था छैन । ६–७ वटा खेल सकिएपछि उपाधिबारे भन्न सकिन्छ । त्यसका बाबजुद हामी उपाधि दाबेदार हौं । राम्रा खेलाडी छन्, चुनौती पनि उत्तिकै छन् । हामी उपाधि जित्दै इतिहास रच्न चाहन्छौं ।”

लिग रोकिए पनि विभागीय टोली आर्मीले नियमित प्रशिक्षणलाई निरन्तरता दिएको छ । दशैँ र तिहारको विदाबाहेक टोली नियमित प्रशिक्षणमा रहेको न्यौपानले बताए । शनिबार आर्मीले च्यासल युथ क्लबसँग प्रतिस्पर्धा गर्नेछ । सोही दिन मनाङले एनआरटीविरुद्ध खेल्नेछ । मनाङले पहिलो खेलमा ब्रिगेडब्वाइजसँग एक शून्यले पछि परेको स्थिति उल्टाउँदै ३–१ को नतिजा निकालेको थियो । मनाङ अहिले शीर्ष स्थानमा छ । राष्ट्रिय टोलीका खेलाडीको बर्चस्व रहेको मनाङका लागि यो एक महिने विश्राम सबैभन्दा फलदायी बन्यो । सिक्किम गभर्नर्स गोल्डकप खेल्न भारत पुगेको मनाङले उपाधि जितेर फर्किएको थियो ।

“यो विश्राम हाम्रो लागि एकदमै फलदायी रह्यो । सधैँ हामी गभर्नर्स गोल्डकपको फाइनलमा पराजित हुँदै आएका थियौं । तर, यसपाली हामीले उपाधि जित्न सफल भयौं । तिहारको विदापछि हिजोबाट हामीले अभ्यास शुरु गरेका छौं । सिक्किममा राम्रा टोलीहरुसँग खेल्न पायौं । जसका कारण खेलाडीको मनोबल पनि बढेको छ,” पहिलो खेलको नतिजाबारे मनाङका कप्तान विराज महर्जनले भने, “पहिलो खेल जुनसुकै टोलीका लागि महत्वपूर्ण हुन्छ । पहिलो खेलमै हामीले राम्रो नतिजा निकालेका छौं । जसका कारण खेलाडीको मनोबल बढेको छ । एउटा खेलाडीका रुपमा यति लामो ग्याप नभइदिएको भए राम्रो हुन्थ्यो भन्ने लाग्छ । यसरी ग्याप हुँदा खेलाडीले लय गुमाउने, फिटनेसमा समस्या आउन सक्छ । तर सिक्किम भ्रमणले खेलाडी नियमित खेलिरहेका छन् ।” 

मनाङ सहिद स्मारक लिग सबैभन्दा धेरै जित्ने टोली हो । साविक विजेता मनाङले यसअघि सातपटक लिगको उपाधि जितिसकेको छ । मनाङ यसपालि पनि उपाधि रक्षा गर्ने अभियानमा छ । मनाङलाई विगत ६ महिनादेखि अफ्रिकन फुजा तोफेले प्रशिक्षण दिइरहेका छन् । तोफेलाई सुमन श्रेष्ठले सहायकका रुपमा सघाएका छन् । 

मनाङका कप्तान विराज अहिले प्रतिस्पर्धा बढे पनि आफ्नो टोलीले उपाधिको बलियो दाबेदार भएको बताउँछन् । “यसपालि सबै टोली उत्तिकै राम्रो छ । पहिला आर्मी, पुलिस, थ्री स्टार र मनाङबीच उपाधिका लागि प्रतिस्पर्धा हुन्थ्यो । तर अहिले ६, ७ टोली उपाधि होडमा हुनेजस्तो देखिन्छ,” महर्जनले थपे, “तर हामी त्यसका लागि बलियो दाबेदार हौं । हामीले सिक्किममा राम्रो टिमसँग खेल्न पायौं । सबै खेलाडी लयमा छन् । पहिलो खेलमा पनि राम्रो नतिजा निकालेका छौं । अहिले शीर्ष स्थानमा छौं । त्यसलाई कायम राख्नुपर्छ ।”

एनआरटीले आर्थिक स्थिति देखाउँदै एकवर्ष ए डिभिजन लिग नखेलेपछि पुनः बी डिभिजन खेलेर अहिले शीर्ष डिभिजनमा उक्लिएको हो । एनआरटीको इतिहास पनि राम्रो छ । चार पटक उपाधि उचालिसकेको एनआरटीले पहिलो खेलमा आर्मीलाई बलियो चुनौती पेस गरेको थियो । नेपाल पुलिस क्लब पनि यूवा खेलाडीको जोशमा छ । प्राविधिक रुपमा बलियो देखिएको पुलिस क्लबका प्रशिक्षक अनन्त थापाले आफुहरु पनि उपाधि होडमा रहेको बताए । 

“हामी निरन्तर अभ्यासमा छौं । युवा खेलाडीको बर्चश्व भएकाले लडाकु टोली छ । लिगमा हामीलाई यूवा टोली हुनुको फाइदा पनि छ । युवाहरु जति खेल्दै गयो त्यति परिपक्क हुँदै जान्छन्,” प्रशिक्षक थापाले थपे, “भोला सिलवाल जस्ता अनुभवी खेलाडी हामीसँग छन् । उनको अनुभवलाई हामी प्रयोग गर्छौं । उनको अनुभवले यूवा खेलाडीलाई पनि प्रेरण दिनेछ ।”

पुलिस क्लबले भने खेलाडीलाई दशैँ बिदा दिए पनि तिहारमा बिदा दिएन । विभागीय टोली निरन्तर अभ्यासमा छ । प्रशिक्षक थापाले सबै टोली राम्रा भएकाले प्रत्येक खेल उत्तिकै महत्वका साथ खेल्ने बताए । “अहिले सबै टोली उत्तिकै राम्रा छन् । हामी प्रत्येक टोलीसँग सचेत भएर खेल्छौं । हामी हरेक नयाँ खेललाई चुनौतीका रुपमा लिन्छौं,” प्रशिक्षक थापाले थपे, “मनाङ, थ्री स्टार, आर्मी नै बलियो हो । तर अन्य टोली पनि उत्तिकै राम्रो भएर आएको छ । तथापी हामी उपाधि दाबेदार हो । हाम्रो तयारी त्यसकै लागि हो ।”

नेपाल पुलिस क्लबले आइतबार मच्छिन्द्र क्लबसँग प्रतिस्पर्धा गर्नेछ । आइतबारै ललितपुरको थ्री स्टारले ब्रिगेडब्वाइजसँग खेल्नेछ । थ्री स्टारले पहिलो खेलमा फ्रेन्ड्स क्लबलाई २–१ ले हराएको थियो । थ्री स्टारले पनि नियमित अभ्यास गरिरहेको छ । चार दिनको तिहार बिदापछि नियमित अभ्यासमा जुटिसकेको थ्री स्टारका प्रशिक्षक मेघराज केसी एक चरणको खेल सकिँदा नयाँ खेलाडीहरुले आफुलाई प्रमाणित गरेको बताउँछन् ।

“लामो समय लिग नहुँदा खेलाडी अभाव हुन्छ भन्ने थियो, तर त्यस्तो देखिएन । नयाँ खेलाडीहरुले पनि आफ्नोे क्षमता प्रमाणित गरिरहेका छन्,” पहिलो चरणको खेल सकिँदा केसीले भन्छन्, “एउटा खेल हेरर कुनै पनि टोलीलाई आँकलन गर्न सकिँदैन । कतिपय टोलीले विदेशी खेलाडी खेलाउन पाएनन् । त्यसैले टोलीहरुको वास्तविक परीक्षा भएको छैन । हामी लामो समयदेखि नियमित अभ्यासमा छौं । टिम राम्रो छ । उपाधि दाबेदारमा त हाम्रो नामै काफी छ नी ।”