काठमाडौं । अमेरिकी प्रथम महिला मेलानिया ट्रम्प आफ्ना पति राष्ट्रपति डोनाल्ड ट्रम्प प्रशासनका स्टाफसँगको झगडाका कारण अहिले चर्चामा छन् । करिब १२ वर्षअघि मात्रै अमेरिकी नागरिक बनेकी मेलानियाका बारेमा के भनिन थालेको छ भने उनी सन्  १९८७ मा तत्कालीन राष्ट्रपति रोनाल्ड रेगनकी पत्नी नान्सी रेगनले आफ्ना पतिलाई कर्मचारीको बारेमा पोल लगाएकै शैली अहिले पछ्याउन थालेकी छन् । 

गएको मंगलबार मात्रै मेलानियाको सचिवालयले राष्ट्रिय सुरक्षा उपसल्लाहकार मिरा रिकार्डेललाई नै बर्खास्त गर्न आग्रह गर्‍यो । प्रथम महिलाका प्रवक्ता स्टेफानी गृसामले वक्तव्य नै जारी गरेर रिकार्डेल ह्वाइटहाउसमा काम गर्न डिजर्भ गर्ने खालकी नरहेको बताएकी थिइन् । मेलानियाका कर्मचारीहरुले रिकार्डेललाई ‘फायर’ गरेको नभइ आफैं आफ्नो सिट खाली गरेर जान भनिएको बताएका छन् । 

ह्वाइटहाउसका अधिकारीहरुका अनुसार उनले रिकार्डेललाई अहिले सम्म भेटेकी भने छैनन् । दिवालीको  अवसरमा मंगलबार मात्रै आयोजित एक कार्यक्रममा मंगलबार राष्ट्रपति ट्रम्पसँगै  रिकार्डेल पनि थिइन् । अधिकारीहरुका अनुसार रिकार्डेललाई राष्ट्रिय सुरक्षा सल्लाहकार जोहन बोल्टनले यसैवर्ष नियुक्त गरेका हुन् । उनको प्रथम महिलासँग मात्रै होइन कि प्रथम महिलाका  कर्मचारीसँग पनि त्यति राम्रो सम्बन्ध छैन । 

रिकार्डेलको मेलानियाको अफ्रिका भ्रमणको विषयलाई लिएर पनि विवाद भएको हो । मेलानिया गएको साता घाना, मलावी, केन्या र इजिप्टको भ्रमणमा गएकी थिइन् । 

रिकार्डेल अफ्रिका नगएकोमा मेलानियाका स्टाफको गुनासो थियो । मेलानिया आफ्नो पोशाकका कारण समेत अफ्रिका भ्रमणका क्रममा विवादमा आएकी थिइन् । रिकार्डेलले ट्रम्प प्रशासनको सबैभन्दा उच्च तहकी महिला मध्येकी एक भएर काम गरिरहेकी छन् । मंगलबार दिउँसोसम्मको अवस्थामा रिकार्डेल फायर भइसकेकी थिइनन् । उनले काम गरिरहेकी थिइन् । 

डेली कलरसँगको बुधबारको एक अन्तर्वार्तामा राष्ट्रपति ट्रम्पले भने आफूले यी विषयमा हेरिरहेको तर निर्णय भने नगरेको बताएका छन् ।  प्रथम महिलाले सधैँजसो आफ्ना पतिलाई केही न केही एक्सन लिन उकास्ने गरेकी छन्  । जुन खालको गतिविधि सन् १९८७ ताका प्रथम महिला नान्सी रेगनले पनि गर्ने गरेकी थिइन् । त्यतिबेला पनि रोनाल्ड रेगनका स्टाफ प्रमुख डोनाल्ड रेगनलाई हटाउन आग्रह गर्ने गर्थिन् । तर, त्यतिबेला अहिलेको जस्तो हल्लीखल्ली हुँदैनथ्यो । सबै काम पर्दाभित्रैबाट हुने गर्दथ्यो । तर, अहिले भने प्रथम महिलाको सचिवालयले प्रशासनको कर्मचारीको बारेमा सार्वजनिक वक्तव्य नै निकाल्न थालेको छ । राष्ट्रिय सुरक्षा परिषद्का प्रवक्ता गारेट मार्कुइजले यसबारेमा कुनै टिप्पणी गर्न चाहेनन् । गएको मार्चमा राष्ट्रिय सुरक्षा सल्लाहकार बोल्टनले रिकार्डेललाई आफ्नो सहयोगीको रुपमा नियुक्त गरेका थिए । उनी त्यसअघि वाणिज्य मन्त्रालयमा हतियार नियन्त्रण सम्बन्धी उपसचिवका रुपमा कार्यरत थिइन् । त्यो भन्दा अघि उनी विदेश मन्त्रालय र कंग्रेसमा पनि काम गरी सकेकी हुन् । 

मेलानियासँगको विवादमा ह्वाइट हाउसका स्टाफ प्रमुख जोहन केली पनि अहिले काम छोड्ने तयारीमा पुगेका छन् । प्रथम महिलाले भनेअनुसार उनको सचिवालयका कर्मचारीलाई बढुवा नगरेको भन्ने आरोप केली माथि लागेको छ । तर, प्रथम महिलाको सचिवालयका अधिकारीहरुले भने केलीसँग मेलाइनाको राम्रो सम्बन्ध रहेको र दुई पक्षबीच त्यस्तो विवाद नरहेको दाबी पनि गरेका छन् । केली भने बोलेका छैनन् । तर, प्रथम महिला मेलानियासँगको विवादका कारण जागिर छोड्ने अवस्थामा पुगेको बताइएको  छ।  

ह्वाइटहाउसका कर्मचारीको बढुवाको विषयलाई लिएर पछिल्लो पटक  मंगलबार समेत गरेर उनको प्रथम महिलासँग पटक पटक विवाद भएको बताइएको छ । मेलानियाले आफू निकट कर्मचारीलाई बढुवा गरिदिन आग्रह गरेकोमा केलीले भनेको नमानेको र उनी स्वयंसँग निकट रहेका कर्मचारीको मात्र बढुवा गरेको आरोप लागेको छ । आफ्नो कुरा नसुनेपछि मेलानियाले राष्ट्रपति ट्रम्प समक्ष उनको विरुद्धमा कुरा गरेकी थिइन् । 

पटकपटकको हस्तक्षेपका कारण हैरान भएका केली स्वयं नै जागिर छोड्ने मूडमा पुगेको ह्वाइटहाउसका स्टाफहरुले बताएका छन् ।  उनको स्थानमा राष्ट्रपतिले उपराष्ट्रपति माइक पेन्सका स्टाफ प्रमुख निक अयर्सलाई नियुक्त गर्ने तयारी भइरहेको जनाइएको छ । 

मेलानियाको विगत
मेलानिया क्नाभ्स् भनिने अहिलेकी अमेरिकी प्रथम महिला डोनाल्ड ट्रम्पसँग विवाह गरेपछि मेलानिया ट्रम्प भएकी हुन् । उनको जन्म १९७० को अप्रिल २६ मा स्लोभेनियामा भएको थियो । पूर्व फेशन मोडेल मेलानियाको जन्म युगोस्लाभ रिपब्लिक स्लोभेनियाको सेभनिकामा भएको हो ।

उनले मिलान र पेरिसमा समेत फेशन मोडेलको रुपमा काम गरेकी थिइन् । उनी सन् १९९६ मा न्यूयोर्क गइन् । त्यहाँ उनको मोडलिङ करियर आइरेन मेरी मोडेल्स र ट्रम्प मोडेल म्यानेजमेन्टसँग सम्बन्धित थियो । उनी सन् २००१ मा अमेरिकाको स्थायी बासिन्दा बनिन् । डोनाल्ड ट्रम्पसँग उनले सन् २००५ मा विवाह गरिन् । र, २००६ मा अमेरिकाको नागरिकता लिइन् । उनको यो नागरिकता त्यतिबेला विवादमा पनि आएको थियो किनकी उनले वर्किङ्ग भिसा होइन पर्यटक भिसामा  काम गरेकी थिइन् । 
बाल्यकाल

मेलानियाका बाबु भिक्टोर क्नाभ्स कार र मोटरसाइकलको डिलर व्यवस्थापनमा संलग्न थिए । उनकी आमा अमालिजा बालबालिकाको कपडा उत्पादन कारखानामा प्याटर्नमेकरको रुपमा काम गर्थिन् । 
त्यतिबेला मेलानिया तथा कारखानाका अरु कामदारका बच्चाहरुले बालबालिकाको कपडा लगाएर फेशन शोमा पनि भाग लिने गर्थे । उनकी दिदी इनेज कलाकार हुन् भने उनको बाबुको पुरानो सम्बन्धबाट जन्मिएका उनका दाजु पनि थिए । दाजुसँग भने उनको सम्पर्क नै नभएको बताइन्छ । उनका पिता लिग अफ कम्युनिष्ट अफ स्लोभेनियाका लागि पनि काम गर्थे ।

जब मेलानिया किशोरी थिइन् उनको परिवार सेभनिकाको दुई तले घरमा सरेको थियो । हाइस्कूल पढ्दा उनी लिजुब्लुजानाको अपार्टमेन्टमा बस्न थालिन् ।उनी स्कूलमा डिजाइन र फोटोग्राफी  सम्बन्धी कक्षामा बस्थिन् । त्यसपछि उनले लिजुब्लुजाना विश्वविद्यालयमा पनि डिजाइन सम्बन्धी १ वर्षजति अध्ययन गरेकी थिइन् ।
 

करियर

उनले ५ वर्षकै उमेरमा मोडलिङ् थालेकी थिइन् । १६ वर्ष पुगेपछि उनले व्यवसायिक काम थालिन् । त्यतिबेला उनले  स्लोभेकियाका फेसन फोटोग्राफर स्टान जर्कोको मोडेलको रुपमा समेत काम गरिन् । जब उनले मोडेलको रुपमा काम थालिन् त्यसपछि उनले आफ्नो थर क्नाभ्सलाई जर्मनशैलीको क्लाउस् बनाइन् । 

१८ वर्षको हुँदा उनले इटालीको मिलानमा रहेको मोडेलिङ एजेन्सीमा काम थालेकी  थिइन् । उनले पेरिसको फेशन हाउसमा समेत काम गरेकी थिइन् । त्यहाँ काम गर्दा उनले सन् १९९५मा ‘महानगर मोडेल’ को सहसञ्चालक पाउलो जाम्पोलीसँग भेटेकी थिइन् । जाम्पोली अहिलेका अमेरिकी राष्ट्रपति ट्रम्पका साथी थिए । उनले नै मेलानियालाई अमेरिका भ्रमणमा जान आग्रह गरेका थिए । १९९६मा मेलानिया अमेरिकाको म्यानहटनमा गइन् । उनलाई अपार्टमेन्टको व्यवस्था उनै जाम्पोलीले गरिदिएका थिए । उनले त्यहाँ १० वटा मोडेलिङको काम गरिन् । त्यसको सात हप्तापछिमात्रै उनले अमेरिकामा काम गर्ने औपचारिक अनुमति पाएकी थिइन् ।

सन् २०१०मा उनले मेलानिया टाइमपिसेज एण्ड जेवेलरी नामको कम्पनी खोलिन् । उनले मेलानिया स्किन केयर कलेक्सनको पनि मार्केटिङ् गरिन् । २०१६ को उनको फाइनान्सियल फाइलिङ्मा देखाइएअनुसार त्यो वर्ष उनलाई १५ हजारदेखि ५० हजार डलर सम्म फाइदा भएको थियो । सन् २०१७ मा ती दुवै कम्पनीले उनीसँगको सम्बन्ध सकिएको जनाएका थिए । त्यतिबेला ह्वाइटहाउसका प्रवक्ताले प्रथम महिलाले आफ्नो बिजनेस प्रभावित पार्न नचाहेको बताएका थिए ।

ट्रम्पसँगको पहिलो भेट

१९९८को सेप्टेम्बर महिनामा त्यतिबेलाका रियल स्टेट बादशाह डोनाल्ड ट्रम्पका साथी जाम्पोलीद्वारा टाइम्स स्क्वायर नाइटक्लबमा एक पार्टी दिएका थिए । सोही पार्टीमा डोनाल्डसँग उनको पहिलो भेट भएको हो । जाम्पोलीसँग मेलानियाको पेरिसमा परिचय भएको थियो । ट्रम्पको सन् १९९७ को मेमा पारपाचुके भइसकेकाले उनी सो पार्टीमा सिलिना मिडेलफार्टसँग सहभागी भएका थिए । जब मिडेलफार्ट रेस्टरुममा गइन् त्यहीबेला मेलानियासँग ट्रम्प नजिकिए र उनको फोन नम्बर मागे । मेलानियाले पनि ट्रम्पको फोन नम्बर मागिन् । त्यसपछि निरन्तर रुपमा उनीहरुको सम्बन्ध रह्यो । मेलानिया त्यसपछि पनि मोडेलिङ्मा सक्रिय रहिन् । सन् १९९९ मा  न्यूयोर्क टाइम्सले उनलाई एउटा प्रश्न सोधेको थियो, “डोनाल्ड ट्रम्प राष्ट्रपति भएभने तिमी के गर्छौं ?,” उनको जवाफ थियो, “म परम्परागत हुनेछु । बेटी फोर्ड वा ज्याकी केनेडी जस्तै ।”

विवाह

मेलानिया र डोनाल्डबीच सन् २००४ मा इन्गेजमेन्ट भयो । जनवरी २२, २००५मा उनीहरुको विवाह भएको थियो । विवाह मेलानियाको पहिलो थियो भने डोनाल्डको तेस्रो । विवाहमा थुप्रै सेलिब्रेटीहरु आएका थिए । तिनमा तत्कालीन सिनेटर जसलाई ट्रम्पले पछि राष्ट्रपतिको चुनावमा हराए हिलारी क्लिन्टन पनि थिइन् । त्यसैगरी, पूर्वराष्ट्रपति बिल क्लिन्टनसम्म सहभागी भएका थिए । विवाहमा मेलानियाले २ लाख डलर पर्ने पोशाक लगाएकी थिइन् । विवाह भएको करिब १४ महिनापछि सन् २००६ को मार्च २०का दिन उनले छोरा बारोन विलियम ट्रम्पलाई जन्म दिएकी थिइन् । जो अहिले १२ वर्षका मात्रै भए । छोराको बीचको नाम मेलाइनाले जुराएकी हुन् भने सुरुको नाम डोनाल्डले जुराएका हुन् । 

२०१६को चुनावी अभियान

सन् २०१५मा डोनाल्ड राष्ट्रपतिको चुनावी अभियानमा लाग्नुभन्दा अघि मेलानियालाई सार्वजनिक रुपमा कस्तो लागेको छ भनेर सोधिएको थियो, जवाफमा भनेकी थिइन्, ‘‘म उनलाई प्रोत्साहित गर्छु । मलाई थाहा छ अमेरिकाको लागि के गर्न सक्छन् भन्ने कुरा ।’’ उनले सन् २०१६मा सीएनएनसँगको अन्तर्वार्तामा प्रथम महिलाको रुपमा आफूले महिला र केटाकेटीलाई मद्दत गर्ने बताएकी थिइन् । उनका अहिले प्रथम महिलाका रुपमा ९ जना स्टाफ  छन् । उनी जोह क्विन्सी आडम्सकी पत्नी (लण्डनमा जन्मेकी) लुइसा आडम्सपछि अमेरिकी प्रथम महिला बन्ने दोस्रो विदेशमा जन्मेकी व्यक्ति हुन् । र, मातृभाषा अंग्रेजी नभएकी चाहिं पहिलो प्रथम महिला हुन् । अझै दुईवर्षजति उनी प्रथम महिलाकै रुपमा रहने लगभग निश्चित छ । तर, उनको कार्यशैलीले ट्रम्प प्रशासनकै कर्मचारी भने हैरान छन् । 

(समाचार एजेन्सीहरुको सहयोगमा)