काठमाडौं । नेपाली कांग्रेसका नेता प्रकाशमान सिंह र पूर्वराजा ज्ञानेन्द्र शाहबीच राजधानीको सोल्टी होटलमा भेटवार्ता भएको तस्बिर सार्वजनिक भएपछि अनेक टिप्पणी सार्वजनिक भएका छन् । दुवैले मन्द मुस्कानसहित उभिएर नै कुराकानी गरिरहेको तस्बिर सामाजिक सञ्जालमा सार्वजनिक भएको थियो ।
यसबारेमा कांग्रेस नेता सिंहसँग बाह्रखरीले जिज्ञासा राख्दा उनले बुधबार बिहान पूर्वराजासँग आफ्नो भेट भएको स्वीकार गरे । उनको भनाइ थियो, ‘‘क्रिकेट एशोसिएसन अफ नेपालका पूर्वअध्यक्ष जयकुमारनाथ शाहको परिवारको एउटा कार्यक्रम सोल्टी होटलमा थियो । त्यहाँ पूर्वराजापनि जानुभएको रहेछ । भेट्दा हुन्छ भन्ने कुरा भएकोले पार्टीमा भेटेको हूँ ।’’
के कुरा भयो त भन्ने जिज्ञासामा कांग्रेस नेता सिंहले स्वास्थ्य के कस्तो छ भन्ने बारेमा मात्रै सोधेको जानकारी दिए । ‘‘अरु त्यस्तो केही पनि होइन । पार्टीमा सामान्य रुपमा भेटेको हो,’’ सिंहको भनाइ थियो ।
तस्बिर सामाजिक सञ्जालबाट