काठमाडौं । गायिका सुष्मा राईले आफ्नो पहिलो गीत सार्वजनिक गरेकी छन् । “नबाँडन.....” बोलको गीत उनले यसै साता सार्वजनिक गरेकी हुन् । गीतको शब्द स्वयम गायिका राईकै छ भने संगीत कल्याण सिंहको रहेको छ । एरेन्ज प्रदीप जोशीले गरेका छन् । 

 

काठमाडौंको बौद्धमा छायांकन गरिएको गीतको भिडियो ब्रायन राईले खिचेका हुन् भने सम्पादन विनय कंशाकारले गरेका छन् । निर्देशन गायिका राई आफैंले गरेकी छन् । 

गायिका राईले गीतको म्युजिक भिडियो पनि सार्वजनिक गरेकी छन् । गीतमा राई स्वयमले अभिनय गरेकी छन् । भिडियोमा पुरुष मोडल भने छैनन् । “केही नयाँ गरौं भन्ने हो, मेरो गीत पनि अरु भन्दा कही फरक छ” उनले भनिन्, “पूर्वीया र पश्चिमी संगीतको फ्युजन गर्न मलाई मन पर्छ ।”

 

सानै उमेरदेखि गीत संगीतप्रति रुची भएकी उनी बच्चै देखि कविता लेख्थिन् । “म सानै देखि कविता लेख्थे,” उनले भनिन्, “पुस्तक पनि ट्रान्स्लेट गर्थें, त्यही समयदेखि बच्चै उमेरबाट गीत संगीतप्रति मेरो झुकाव थियो ।”

 

समाजशास्त्रमा स्नातकोत्तर गरेकी राई अहिले पीएचडी गर्ने तयारीमा छिन् । उनी “नबाँडन....”को प्रतिक्रिया हेरेर अरु गीतको तयारी गर्ने सोचमा छिन् । “अब औपचारिक अध्ययन करिब सकियो, अब संगीतको यात्रा प्रारम्भ भयो,” राई भन्छिन्, “अब यो गीतको फिड ब्याक कस्तो आउँछ त्यही अनुसार गीत ल्याउँछु । तर, म एक्पेरिमेन्टल गीत नै गर्छु । अरु भन्दा केही फरक नै गर्छु ।”

 

सुस्मा समय सन्दर्भ अनुसार आफूलाई सबै खाले गीत मन पर्ने भए पनि विशेष गरि फरक धारका गीत नै मन पर्ने बताउँछिन् । 

 

राई सञ्चारकर्मी पनि हुन् । फुसर्द डट कमबाट सञ्चार यात्रा सुरु गरेकी राईले केही समय एनटीभी प्लसमा चिया गफ नामक टक सो पनि चालाइन् । अहिले भने उनी इमेज एफएममा कार्यरत छिन् । इमेजमा उनी दैनिक दुई घण्टा लामो नो हर्न प्लिज नामक कार्यक्रम संचालन गर्दै आएकी छन् ।  

 

जुलाई २० मा युट्युवमा अपलोड गरिएको नवाँडनको म्युजिक भिडियो अहिलेसम्म २१ हजार भन्दा धेरैपटक सर्च गरिएको छ ।