काठमाडौँ । विभागीय टोली सशस्त्र प्रहरीको (एपीएफ) क्लब राष्ट्रिय महिला क्रिकेट प्रतियोगिताको फाइनलमा प्रवेश गरेको छ । 

पहिलो खेलमा मध्यमाञ्चललाई पराजित गरेको एपीएफले आइतबार मध्यपश्चिमाञ्चललाई ९ विकेटले पराजित गरेपछि लगातार दोस्रो जितसँगै फाइनल प्रवेश गरेको हो । समूह ए मा रहेको एपीएफले लगातार दोस्रो जितसंगै ४ अंक जोडेको छ ।

कीर्तिपुरस्थित त्रिवि क्रिकेट मैदानमा मध्य पश्चिमाञ्चलले दिएको ६५ रनको लक्ष्य एपीएफले मात्र एक विकेट गुमाएर पुरा गर्यो । एपीएफको जितमा सिता राना मगरले २७ तथा ज्योति पाण्डेले अविजित २३ रन जोडे । त्यस्तै सरिता मगर ४ रनमा अविजित रहिन् ।

यसअघि टस हारेर पहिले ब्याटिङको निम्तो पाएको मध्य पश्चिमाञ्चलले निर्धारित २० ओभरमा ८ विकेट गुमाएर ६४ रनको योगफल तयार गरेको थियो । उसको लागि लक्ष्मी चौधरीले २२ तथा नेरी थापा मगरले ११ रन बनाउनु बाहेक अन्य ब्याट्सवुमनले दोहोरो अंक जोड्न सकेनन । एपीएफका लागि सरिता मगरले ३ तथा ऋतु कोंजिया र सिता राना मगरले समान २–२ विकेट लिइन ।

यस्तै प्रतियोगिता अन्तर्गत आइतबार भएको पहिलो खेलमा सुदुर पश्चिमाञ्चलले मध्यमाञ्चललाई ८ विकेटले पराजित गर्दै पहिलो जित निकाल्यो । मध्यमाञ्चलले दिएको ९२ रनको लक्ष्य सुदुर पश्चिमाञ्चलले मात्र २ विकेट गुमाएर पुरा गर्यो । सुदुर पश्चिमाञ्चलको जितमा रोशनी बोहराले अविजित ३६ तथा कविता जोशीले पनि अविजित २५ रन जोडिन ।

यसअघि टस हारेर पहिले ब्याटिङ गरेको मध्यमाञ्चलले निर्धारित २० ओभरमा ३ विकेट गुमाएर ९१ रन जोडेको थियो । मध्यमाञ्चलका इन्दु बर्माले ४३ तथा वर्षा रानाले अविजित ३३ रन जोडिन । जितसँगै सुदुर पश्चिमाञ्चलले समूह बि मा २ अंक जोडेको छ । र, समुहको दोस्रो स्थानमा छ । समूह बी मा पूर्वाञ्चल शीर्ष स्थानमा रहदा लगातार दुई खेल गुमाएको मध्यमाञ्चल पुछारमा छ ।