निर्मला हत्याकाण्डः अनिश्चितकालीन धर्नामा बस्दै परिवार, नभए अनशन थाल्ने

निर्मला हत्याकाण्डः अनिश्चितकालीन धर्नामा बस्दै परिवार, नभए अनशन थाल्ने

काठमाडौं । कञ्चनपुरकी १३ वर्षीया किशोरी निर्मला पन्तको हत्याकाण्डमा संलग्न अपराधीको खोजी गरी तत्काल कारवाही प्रक्रिया अघि बढाउन माग गर्दै आजदेखि जिल्ला प्रशासन कार्यालय कञ्चनपुरमा अनिश्चितकालीन धर्ना दिइने भएको छ । 

निर्मलाका पिता यज्ञराज पन्तले आइतबार बिहान बाह्रखरीसँगको कुराकानीमा भने,‘‘न्याय नदिइएकोले बाध्य भएर आन्दोलनमा उत्रनु परेको हो । धर्ना कार्यक्रमको पनि सुनुवाई भएन भने अनशन बस्ने सोच बनाएका छौं ।’’

उनका अनुसार आइतबारबाट सुरु हुने आन्दोलन कार्यक्रम हत्यारा पत्ता नलागुन्जेलसम्मका लागि अनिश्चितकालीन हुनेछ । आजको कार्यक्रमअनुसार बिहान महेन्द्रनगरको मदनचोकमा स्थानीय बासिन्दा, अधिकारकर्मी तथा  परिवारका सदस्य भेला भएर नगरपरिक्रमा गरी ११ बजे जिल्ला प्रशासन कार्यालयमा पुगेर धर्ना बस्ने कार्यक्रम रहेको छ ।

निर्मलाका पिता यज्ञराजले तिहार अघि पत्रकार सम्मेलनको आयोजना गरी आफूहरुलाई न्याय प्राप्त नभए धर्ना र अनशन जस्ता कार्यक्रममा सरिक हुने जनाएका थिए । आजको धर्नाको तयरीका बारेमा छलफल गर्न महेन्द्रनगरको खुलामञ्चमा स्थानीय महिला अधिकारकर्मी तथा परिवारका सदस्यहरुको भेला भएको थियो । 

निर्मलाकी आमा दुर्गादेवी पन्तले पनि बाह्रखरीसँगको कुराकानीमा यति लामो समय भइसक्दापनि सरकारले न्याय दिने दिशामा केही पनि गर्न नसकेकोले बाध्य भएर धर्नामा उत्रनुपरेको जनाइन् ।  साउन १० गते साथीको घरमा गएकी निर्मला भोलिपल्ट नजिकैको उखुबारीमा मृत अवस्थामा फेला परेकी थिइन् । 
 

प्रतिकृया दिनुहोस