रक्षामन्त्रीको हेलिकप्टर, साइकल मन्त्रीको मोटरको लस्कर

रक्षामन्त्रीको हेलिकप्टर, साइकल मन्त्रीको मोटरको लस्कर

तिहार मूलतः भाइटीका र लक्ष्मीपूजाको अवसर परेकाले गत साता दैनिक पत्रिका चार दिनमात्र पत्रिका प्रकाशित भए (कान्तिपुर पाँच दिन) र सो साता केही महत्त्वपूर्ण घटना भए । महत्वपूर्ण तर दुःखद घटना मानवअधिकारवादी वामपन्थी नेता पद्मरत्न तुलाधर तथा प्रखर कानुनविद् वरिष्ठ अधिवक्ता कुसुम श्रेष्ठको निधन भयो । तर, पाठकले रुचि लिएर पढेका तथा सामाजिक संजालमा निकै चर्चामा रहेका भने अन्य दुई समाचार थिए । 

गत साता आइतवारको नयाँ पत्रिकाले प्रकाशित गरेको समाचार सामाजिक संजाल तथा डिजिटल पत्रिकामा पनि निकै चर्चित रहे । नेकपाको बारामा हुने भनिएको चियापानमा भाग लिन रक्षामन्त्री ईश्वर पोखरेल नेपाली सेनाको हेलिकप्टर चढेर कलैयाको एउटा खेलभइरहेको क्रिकेट मैदानमा ओर्लिए । सो पत्रिकाअनुसार एनप्याब्सनको आयोजनामा सिद्धेश्वर खेल मैदानमा १७ कात्तिक शनिवार २० विद्यालय सहभागी भएको खेल आयोजना हुँदैथियो । तर, पहिलो टी ट्वान्टी खेललाई नै २० ओभरबाट १२ ओभरको म्याच बनाउन दबाब दिएर मन्त्रीको टोली १२ बजेर २० मिनेटमा ओर्लियो । मैदानमा भएका खेलाडी र दर्शकलाई धपाएर मन्त्रीको हेलिकप्टर ओर्लिएको मात्र होइन साढे तीन बजेसम्म त्यहीँ रोकिएर बस्यो । त्यस दिनका बाँकी सबै खेल त अवरुद्ध भए नै हेलीकप्टर उत्रेका कारण क्रिकेट मैदानको पिच समेत भत्किएको आयोजकले गुनासो गरेका छन् । अन्यत्र हेलिकप्टर उतार्नका लागि आयोजकले आग्रह गर्दा समेत सेना आएर सोही खेल भइरहेको मैदानमा हेलिकप्टर उतारे । तिहारअघि नै सबै खेल सक्ने आयोजकको सम्पूर्ण तयारी त्यही हेलिकप्टर अवतरण र पिच भत्केका कारण तिहारपछिका लागि सरेको छ । रक्षामन्त्रीको यो भ्रमणलाई सर्वत्र नकारात्मकरूपमा टिप्पणी गरिएको छ । 

नेकपाका नेताहरूमा इमानदार, सक्षम र साधारण जीवन यापन गर्ने नेताका रूपमा पहिचान बनाएका संघीय मामला तथा सामान्य प्रशासनमन्त्री लालबाबु पण्डितको विषयमा मंगलबार कान्तिपुरमा प्रकाशित समाचारले पनि धेरैको भ्रम हटाएको छ । सो दैनिकमा अब्दुल्लाह मियाँले लेखेको समाचारअनुसार गएको वर्ष चैत २९ गते आफ्नो सम्पत्ति विवरणमा एउटा पुरानो साइकलमात्र रहेको देखाउने यी नेताको निवासदेखि कार्यालयसम्म अहिले निजी प्रयोगका लागि गाडीको लस्कर राखिएको छ । 

मन्त्री नहुँदा सार्वजनिक बस, टेम्पो तथा साइकल प्रयोग गर्ने तिनै पण्डितकी अहिले पत्नीदेखि स्वकीय सचिव र कार्यकर्तासम्मलाई सरकारी गाडी उपलब्ध गराइएको छ । समाचारअनुसार उनको निजी प्रयोगका लागि दुई गाडी एउटा एसयुभी र एउटा कार तैनाथ छन् । त्यसबाहेक उनकी पत्नी विमला महतका लागि मन्त्रालयकै पहिले स्थानीय विकास राज्यमन्त्री चढ्ने गाडी लिइएको छ । उनका स्वकीय सचिवले समेत एउटा टोयोटा हाइलक्स पिकअपको दुरुपयोग गरेको सो समाचारमा जनाइएको छ । सो समाचारमा स्पष्टरूपमा कुन कुन नंबरका सवारी साधन कुन कुन चालकले चलाउँछन् र ककसले त्यसको प्रयोग गरेका छन् सबै लेखिएको छ । 

नेता पद्मरत्न तुलाधको निधन
वरिष्ठ मानव अधिकारवादी नेता तथा वामपन्थी बुद्धिजीवी पद्मरत्न तुलाधरको गएको आइतवार कात्तिक १८ गते नर्भिक अस्पतालमा निधन भएको छ । उनी केही दिनदेखि स्नायुको समस्याका कारण अन्नपूर्ण न्युरो अस्पतालमा रहे पनि उनको स्वास्थ्य अवस्था बिग्रेको र किड्नीमा पनि समस्या देखिएपछि नर्भिक अस्पतालमा ल्याइएको थियो । अठहत्तर वर्षीय तुलाधर पञ्चायतकालमा राष्ट्रिय पञ्चायतको सदस्यमा विजयी भएका थिए र उनले सोही सदनमा नै बहुदलीय व्यवस्थाको माग गरेका थिए । विसं २०५१ सालमा मनमोहन अधिकारीको सरकारमा तुलाधर स्वास्थ्यमन्त्री बनेका थिए । 

तुलाधरको अवसानको समाचारलाई सबै पत्रिकाले प्रथम पृष्ठमा स्थान दिएका थिए । त्यसमध्ये नागरिकले चार कोलममा देवेनको स्केचसहित सबैभन्दा बढी महत्त्व दिएको देखियो । त्यसपछि गोरखापत्रले तुलाधरको मृत्युको समाचारलाई धेरै महत्त्व दियो । नयाँ पत्रिका, हिमालय टाइम्सले दुई कोलम दिए भने कान्तिपुरले माथिल्लो एक कोलमको समाचार बनायो । अन्नपूर्ण पोस्टले यो समाचारलाई एन्कर बनायो भने राजधानीले प्रथम पृष्ठको मध्यभागमा प्रकाशित ग¥यो । 

कानुनविद् श्रेष्ठको निधन

वरिष्ठ अधिवक्ता कुसुम श्रेष्ठको ८३ वर्षको उमेरमा बुधबार निधन भएको समाचार कान्तिपुरले प्रथम पृष्ठमा प्रकाशित गरेको छ । श्वासप्रश्वास सम्बन्धी समस्या देखिएपछि नर्भिक अस्पतालमा भर्ना गरिएका श्रेष्ठ सर्वोच्च अदालत बारका पहिलो अध्यक्ष थिए भने नेपाल बार एसोसिएसन र नेपाल कानुन समाजको समेत अध्यक्ष रहिसकेका थिए । वि.सं. २०३३ सालमा विश्वेश्वरप्रसाद कोइराला मेलमिलापको नीति लिएर नेपाल फर्केपछि उनलाई राज्यले लगाएको मुद्दामा बहस गर्ने तीन मुख्य वकिलमा पनि श्रेष्ठको विशेष उल्लेख हुन्छ । कोइरालाको मुद्दामा बहस गर्नेमा गणेशराज शर्मा, कृष्णप्रसाद भण्डारी तथा कुसुम श्रेष्ठ थिए । गणेशराज शर्माको पनि केही वर्ष पहिले निधन भइसकेको छ ।

प्रतिकृया दिनुहोस