काठमाडौं । सिङगिङ रियालिटी शो ‘नेपाल आइडल’ मा अहिले उत्कृष्ठ आठ प्रतिस्पर्धी बाँकी छन् । गाला राउन्डको ११ औं श्रृंखला चलिरहँदा जारी दोस्रो सिजनको २५ औं श्रृंखला सकिएको छ ।
२५ औं श्रृंखलाको प्रस्तुती हेरेर दर्शकले दिएको भोट र निर्णायकका मतका आधारमा २६ औं श्रृंखलाबाट एक जना प्रतिस्पर्धी बाहिरिनु पर्ने हो । २६ औं श्रृंखला आज (शुक्रबार) साँझ प्रशारण हुँदैछ । तर, २५ औं श्रृंखला प्रतिस्पर्धाका लागि नभएर विशेष श्रृंखला भन्दै प्रशारण गरिएको छ ।
बिहीबार साँझको कार्यक्रममा प्रतिस्पर्धीलाई दीपावलीको अवसर भन्दै निर्णायकले यो हप्ता एलिमेनेट नगरिने बताएका थिए । निर्णायकले दिएको यो उपहार पाएपछि यो हप्ता एलिमेनेट नहुने खुसीमा आठै जना प्रतिस्पर्धी खुसीले नाचेका थिए । यो हप्ता दर्शकले आफूले कुनै पनि प्रतिस्पर्धीलाई भोट गर्नु पर्ने छैन ।
अर्को हप्ताबाट भने नियमित रुपमा कार्यक्रम शुरुचारु हुने बताइएको छ । उत्कृष्ठ आठमा विक्रम बराल, सुमित पाठक, निलिमा थापा, अमित बराल, पवन गिरी, अस्मिता अधिकारी, रवि ओट र कृषल कणेल बाकिँ छन् ।
यी मध्ये निलिमा थापा, विक्रम बराल र सुमित पाठक गोल्डेन माइक पाएर सीधै गाला राउण्डमा प्रवेश गरेका प्रतिस्पर्धी हुन् । गोल्डेन माइक पाएका मीनराज पौडेल भने प्रतिस्पर्धाबाट बाहिरिसकेका छन् ।
तस्बिरः एपीवन टेलिभिजन
