काठमाडौं । नेपाली कांग्रेसका नेता प्रकाशमान सिँहले दुईतिहाई जनमत प्राप्त कम्युनिष्ट नेतृत्वको सरकारले जनतालाई अनुभूत हुने गरी कुनैपनि काम गर्न नसक्ने टिप्पणी गरेका छन् ।
महाकवि लक्ष्मीप्रसाद देवकोटाको जन्मजयन्तीका अवसरमा बुधबार काठमाडौंको जोरपाटीमा आयोजित कार्यक्रममा कांग्रेस नेता सिँहले भने, ‘‘बजारमा महंगी कहाली लाग्दो भएको छ । शान्ति–सुरक्षा झनझन कमजोर बनिरहेको छ । संघियता कार्यान्वयनमा उदासिन सरकार अनावश्यक कुरामा अल्मलिएको छ । यसले जनताले अनुभव हुने गरी केही पनि काम गर्न सक्दैन ।’’
नेता सिँहले सरकारलाई खबरदारी गर्नुपर्ने कर्तव्य भएपनि प्रतिपक्षी दल प्रभावहिन भएकाले मुलुकको अवस्था चिताजनक बनेको बताए । कांग्रेस सभापति शेरबहादुर देउवाले पार्टीलाई विधान अनुरुप चलाउन नसकेका कारण मुलुकको अवस्था जर्जर भएको उनले आरोप लगाए ।