काठमाडौं । मैथिली चलचित्र ‘प्रेमक बसात’ रिलिज भएको छ । तिहारको छेको पारेर कात्तिक १६ गते रिलिज भएको मैथिली चलचित्र ‘प्रेमक बसात’ले मिथिला क्षेत्रका दर्शक पाएको छ । कमै मात्रै निर्माण हुने गरेको मैथिली चलचित्र अन्तर्गत ‘प्रेमक बसात’ले यसको प्रमोशनको लागि निकै दौडधुप गरेको थियो ।
नेपाल लगायत भारतका विहारमा यस चलचित्रले प्रचारमा निकै लगानी गरेको छ । यो चलचित्रको प्रचारको शैली र प्रमोशनले मैथिली चलचित्र बल्ल प्रोफेसन हुन लागेको छनकसमेत दिएको छ ।
चलचित्रका लेखक तथा निर्देशक रुपक शररले यसको कथा, पटकथा तथा गीतसंगीतले दर्शकको मन जितेको दावब गरेका छन् ।
यद्यपि कथा भन्ने शैली प्रभावकारी नभएको र कलकारको अभियनलाई सटिक ढंगले उपयोग नगरिएको चलचित्र समीक्षकहरुको भनाइ छ । कम बन्ने र लामो अन्तरालपछि बन्ने भएर पनि मैथिली चलचित्रले राम्रो दर्शक पाएको उनीहरुको भनाइ छ ।
नेपालका मिथिला क्षेत्र जनकपुर, विरगंजलगायतमा चलचित्र प्रदर्शन भइरहेको छ भने भारतमासमेत प्रर्दशन जारी रहेको छ ।
चलचित्रमा मुख्य भूमिकामा नेपालका मोडेल पीयूष कर्ण र कोलकाताकी चर्चित अभिनेत्री रैना बैनर्जी रहेका छन् भने पहिलो पटक बलिउडका चर्चित गायक उदित नाराणका छोरा आदित्य नारायणले मैथिली फिल्ममा गीत गाएका छन् । गायनमा उनलाई तोची रैनाले साथ दिएकी छन् । संगीतमा मिथिलाका चर्चित संगीतकार प्रवेश मल्लिक, सरोज सुमन तथा एस कुमार रहेका छन् । गीत अयोध्यानाथ चौधरी, शेखर अस्तित्व र सारिका कुमारले लेखेका छन् । चलचित्र वेदांत झाले निर्माण गरेका हुन् ।