काठमाडौं । निर्माण व्यवसायी महासंघका तत्कालीन अध्यक्ष शरदकुमार गौचनको हत्याका मुख्य योजनाकार गुन्डा नाइके समीरमानसिंह बस्नेतकी श्रीमती माया बस्नेत पक्राउ परेकी छन् । महानगरीय अपराध महाशाखाको टोलीले मायालाई काठमाडौंको सीतापाइलाबाट आइतबार बिहान पक्राउ गरेको हो । 

महाशाखाका एसएसपी धीरजप्रताप सिंहका अनुसार गौचन हत्यालगायत अन्य घटनामा पनि उनको संलग्नता देखिएकाले अनुसन्धानका लागि आइतबार बिहान काठमाडौंको ठूलो भर्याङबाट मायालाई पक्राउ गरिएको हो । 
मायालाई पक्राउ गर्नका लागि तीनदिनदेखि प्रहरी लागिपरेको थियो । 

गौचन हत्यामा प्रयोग भएको हतियारको व्यवस्थापन बस्नेतकी श्रीमती मायाले नै गरेको प्रहरी आरोप छ ।

यसअघि महाशाखाले कात्तिक १२ गते लोप्साङ लामा, अम्बर बहादुर राना र रोशन बुढाथोकीलाई पक्राउ गरेपछि मायाको संलग्नताको बारेमा थप रहस्य खुलेको प्रहरीले जनाएको छ ।

जेलबाटै धन्दा चलाउन थालेपछि बस्नेतलाई प्रहरीले मुस्ताङ सरुवा गरेको थियो । त्यसलगत्तै मायाले ‘इन्काउन्टर’ का लागि आफ्नो श्रीमानलाई रातारात मुस्ताङ सरुवा गरिएको भन्दै पत्रकार सम्मेलन गरेकी थिइन् ।

पक्राउ परेका तीनै जनाले अदालतमा समेत हत्यामा समीरको श्रीमतीको समेत संलग्नता भएको बयान दिएका थिए । गौचनलाई गोली हान्ने बेलामा पनि समीरकै श्रीमतीले पेस्तोल दिएको र आफूले गोली हानेको अम्बरले बयानमा उल्लेख गरेको प्रहरी बताउँछ ।

मायाका श्रीमान समीर मुस्ताङ कारागारमा छन् । उनी गत मंसिरमा पक्राउ परेका थिए । गौचन हत्याका योजनाकार समीरमानसिंह बस्नेत समूहका सुटर अमर बहादुर राना, लोप्साङ भनिने सोम तामाङ र रोशन बुढाथोकीले समीरकी श्रीमतीको संलग्नताको बयान दिएपछि महाशाखाले ३ दिनदेखि खोजी गरेको थियो । 

प्रहरी स्रोतका अनुसार गौचन हत्या, प्रहरी इन्काउन्टरमा मारिएका गुन्डा नाइके दिनेश अधिकारी चरीमाथिको आक्रमण र दाबा लामामाथि गोली प्रहार समीरमानको योजनामा भएको र त्यसमा हतियारको व्यवस्थान मायाले गरेको खुलासा सुटर अमर बहादुर रानाले गरेका थिए । 

यस्तै समीरमानले एक जना व्यक्तिमार्फत हतियार उपलब्ध गराएपछि युवा संघ रुपन्देहीका अध्यक्ष दुर्गा तिवारीलाई आफुले गोली चलाएको बयान लोप्साङले दिएका थिए ।  अमर रानाका अनुसार काभ्रेली गुन्डा नाइके दाबा लामालाई गोली हाने लगत्तै उनले मायालाई हतियार राख्न दिएका थिए  ।